Майрал 8-нний Дагъусттаннал Дакьаврил фондрал ва АЗС «VNК» сетьрал барча бунни МахIачкъалалиясса ва Каспийскалиясса ветерантал.
П. Рамазанова
Дакьаврил фондрал правлениялул председатель Мухтар Даудовлул, ветерантал барча буллай, кIицI лавгунни цала ппу Даудов АьбдулхIамидгу дяъвилул цIаравух увккун, 1946 шинал Архмур Машрикьлия шавай зана хьушиву, буттал чIавама уссу Аьлибагма аьрая зана къавхьушиву, чIирисса шяравату, Хъюйятугума, 39 инсан аьрая зана къавхьушиву.
Вай кIицI лавгсса идарарттал ветерантуран дуллунни бахшишругу. Цалва чулухасса ссайгъат гьан бувну бия ветерантуран «Щюллисса гьивч» супермаркетралгу.
Барча бувсса ветерантуравух бия февраль зуруй 100 шин хьусса Пономарева Галинагу, ванил бувсунни цуппа хIакьинусса кьинигу инсантуран шайсса кумаг буллай бушиву, хьхьируннан ва ччитран дуканмур дуллан бикIайшиву. Ветерантурал дакIнихтунусса барчаллагь увкунни цахра къулагъас дурминнахь.
