Райондалий дувайсса гьарцагу олимпиадарттай , жура-журасса конкурсирдай Ккуллал I-мур школалул мудангу бугьайссар хьхьичIунсса кIанттурду ва ттигу бугьлайнма буссар.
Гьай-гьай, микку хъинну хъунмасса бияла оьрчIахь дарсру дихьлахьисса учительтурахьгу буссар.
Мукунминнавасса цану бур педагогикалул институт къуртал бувну, 1969-ку шиная шинмай буттал шяраву дарс дихьлахьисса МахIаммадлул душ Гулшагь МахIмудова.
Ва бур оьрус мазрал ва литературалул специалист. Ванил тарбия бувсса оьрчIал цимилгу бувгьуссар хьхьичIунсса кIанттурду хъуни-хъунисса олимпиадарттай.
Олимпиадарттай бакъассагу, ванил дарс дирхьусса оьрчIру ххув хьуссар личIи-личIийсса конкурсирдайгу: сочинение чичаврил, дюхханну назму дуккаврил ва мукунма цайми-цаймигу иширттаву.
[dropcap]Ч[/dropcap]Iярусса шиннардий дакIнихтуну бивхьусса захIматрахлу 2008-кусса шинал Гулшагь МахIмудован дуллуссар «ДР-лул лайкь хьусса учитель» тIисса хьхьичIунсса цIагу. Гьай-гьай, ваничIа цачIун хьуну дур диялсса хIурматрал грамотарттугу, барчаллагьрал чагъардугу. Ванил дарсру дирхьусса оьрчIру ва душру буссар, райондалий хьуннав, Дагъусттаннай хьуннав, Аьрасатнаву хьуннав, хъуни-хъунисса, хьхьичIу-хьхьичIунсса давурттай, къуллугъирттай зий.
Цила лас МахIаммадлущал Гулшагьлул, хъунигу бувну, ларайсса кIулшивурттугу ласун бувну, ххаллилну чивун уккан увну уссар мукьа оьрчI. Ппу МахIаммадгу хIакьинусса кьинигу зий уссар вава школалий учительну. Ва хъанай ур, Ккулув акъассагу , щаллагу райондалий ца яла хьхьичIунсса химиялул специалист. Ваналгу хIалал дурссар «Дагъусттан Республикалул лайкь хьусса учитель» тIисса цIа.
ХIурмат лавайсса Гулшагь ва МахIаммад, цIуллушиву дулуннав зухьхьун, оьрмурдая щалихханнин битаннав!
Гугьарша Далиева,
Ккуллал 1-мур
школалул учитель