Гьарца шинал кIицI лагайсса доноршиврул акциялул лагрулий Республикалул оьтту бутIаврил станциялий 50 литра оьттул ва миннул компонентирттал хIадур дунни.КIива-шанма гьантлул мутталий ва акция най дия Миллатирттал доноршиврул кьинилун хасну. ХьхьичIва-хьхьичI ва кьини лахъа-хъун байссар цанма гъан-кIул бакъасса инсантурал оьрмурду ххассал баврил цIаний уква оьтту буллалисса донортал.
Имара Саидова
Дусшиврул къатрачIа тIивтIусса донортурал станциялийн оьтту булун бувкIунни 150-нния ливчусса инсантал. ЦIуллу-сагъшиву дуруччаврил министерствалул вакилтал бакъассагу, акциялул даврил чIарав бацIан бувкIунни ДР-лул Виваллил иширттал министерствалул зузалт, Дагъусттаннал медициналул университетрал ректор Сулайман Маммаев, Башларовлул цIанийсса медициналул колледжрал студентътал ва м.ц.
«Волонтертал-медиктал» тIисса центрданул вакилтурал бавчIунни «Ттул хъирив ачу. На – жаваблувсса донорда» тIисса цIанилусса буклетру. Вай буклетру бачIаврил мяъна хъуннасса агьамшиву дусса дур, гьарцагу оьтту буллалисса инсан чIун-чIумуй цала цIуллу-сагъшиврул хъирив ивзун икIан аьркиншиву, нигьачIисса азарду цайминнайн къалахъаншиврул.
