Хъузалал Хъун кьини

ТIагьир Къаллаев

Карашрал шяравугу щунни Хъарас

Апрельданул зувинний, биялсса жяматгу бавтIун, Карашрал шяраву кIицI ларгунни Хъарас щаврил шадлугъ. Му эбадатсса кьинилийн бувкIун бия агьлу шагьрурдаяссагу, щархъаяссагу, чIахху-чIарахссагу.

Гьашинусса Хъурдаккаврил Хъун Хъузалану ия Карашрал шяраваллил СПК-лул председатель Аьппаслул арс Къаллаев ТIагьир.Та ухьурчагу, жяматрайн багьайсса гьарцагу чIиви-хъунсса ишираву чялишну гьуртту шайсса, банмунил, битанмунил чIарах ацIайсса инсан ур ТIагьир. Ва ххуллухгу ххуйсса даражалий ва щаллушиндарай лархъунни мунал цайнна ларсун диркIсса му кьинилул хъаргу, мурадгу.


Щарнил лувсса илкинсса къурув, дан аьркинсса аьдат-эбадатругу щаллу дурну, щунни хъузала гъайтIун уккаврил лишандалун хIисавсса Хъарас. Бувунни тIуркIурду, дуртIунни кувннайн кувннал диялсса щинну.
Муния махъ Оьмаров Набинал къатрал гьарза-гьартасса хIаятраву тIивтIуна чумартсса ссупрагу. Лавхъуна махъру, дуруна дуаьртту, чIа увкуна Карашрал жяматрангу, щалва Лакку билаятрангу буллугъсса шин.
Ялунсса шиналсса Хъарас щаврил кьуру лавсунни цайнма Къаллаев Анвардул, ТIагьирдул чIивима уссил.

Бюхъаннав буттал улча!
Жул корр.