ФронтовикначIан шаппай бивунни

Ххувшаврил кьини гъан хъанахъисса гьантрай Дагъус­ттаннал культуралул министр Зарема Буттаева, Лакрал райондалул хъунама Юсуп МахIаммадов, Халкьуннал Мажлисрал депутат Жяъпар Абуев ва Лакрал райондалулЦСОН-далул вакилтал бивунни МахIачкъалалив яхъанахъисса, Ттурциял шяравату­сса фронтовикначIан, къуллугъ кьабивтсса подполковник Аьли­ев ШяпиначIан.

Дагъусттаннал БакIчи Владимир Васильевлул цIанияту ветеран барча уллай, Зарема Буттаевал мунал ичIуваминнахьхьун дуллунни бахшишру, буллунни арцу дусса конвертгу.

Ванил цилва ихтилатраву кIицI лавгунни республикалул хъуниминнал, цаягу фронтовик лях гьан къаивтун, миннах къулагъас дуван­сса хIарачат буллай бушиву, барчаллагь кунни хIурматрай ветераннаха аякьа дуллалисса ванал ичIувацириннахьгу.
Юсуп МахIаммадовлулгу чIур­чIав дурунни Ватан ххассал дуллай бивкIсса вирттаврал оьрмурду утти­сса никиран чувшиврул дарсруну хъанахъишиву. ВанацIун ветеран барча унни Лакрал райондалул циняв вакилтуралгу.

П. Рамазанова