Щаллусса нюжмардул дянив Дагъусттан бия БРИКС-равун багьлагьисса билаятирттал Ссихьрал театрдал ясир бувну. Щалагу дунияллул халкьуннал дянивсса ссихьрал театрдал фестиваль хьунни Дагъусттаннай май зурул 26-нния июнь зурул 1-ннийн дияннин.

Зулайхат Тахакьаева
Магьлувун бакIрайн багьсса хханссия фестиваль тIитIлатIисса шадлугърайн бувкIми. Р. ХIам­затовлул цIанийсса проспектрай хъинну яргсса шоу хIадур дурну дия Бразилиянал, ЮАР-нал, Индиянал, Китайнал ва Аьрасатнал регионнал ссихьрал театрдал артистурал цачIуну.
Магьравасса дэвтал, индиянал эпосравасса ва китайнал фольклорданувасса нартътал, Африканал билаятраясса персонажтал цукссагу хIаллай дакIний личIанссар Дагъусттаннал чIава тамашачитуран.

Оьруснал театрданул хьхьичI ялув кIицI лавгсса театрдал артистурал ккаккан бунни цала спектакллавасса бутIри.
Республикалул БакIчинал цIания хъамал ва тамашачитал барча бувунни ДР-лул ХIукуматрал хъунаманал хъиривчу Анатолий Карибовлул.
— Цалчинни жула билаятрай хъанахъисса укун хъуннасса лагрулийсса Ссихьрал театрдал фестиваль. Ва фестиваль дуван Да­гъусттан язи бугьаву – мугу хъунмасса тIайлабацIур, — увкунни Анатолий Карибовлул
Ихтилатру бунни Бразилиянал, Индиянал, Китайнал, ЮАР-нал, Вологда, Мытищи ва Евпатория шагьрурдал ссихьрал театрдал каялувчитуралгу.

Гьарма ия Дагъусттаннал Ссихьрал театрданийн барчаллагьрай укун хъуннасса ва агьам­сса фестиваль ларайсса сакиншиндарай даврихлу.
— Жу барчаллагьрай буру дагъусттаннал агьалинайн дакI тIиртIуну кьамул баврихлу. Ва иширан Дагъусттаннаяр къулайсса кIану цамур бугу-бакъахьунссар – ва караматсса республикалий цикссагу ттуршукурдай кувннащал кув бавкьуну ялапар хъанай бур чIявусса миллатру. Жу дагъусттаннал агьулданул хIайран бувунну, — увкунни Бразилиянал «Иллюзорио» театрданул каялувчи Игорь Годинья Рошал.

Шадлугърал ахирданий Да­гъусттаннал Ссихьрал театрданул каялувчи, фестивальданул агьаммур сакиншинначи Аминат ЯхIияевал кIицI лавгунни, му так Дагъусттаннал Ссихьрал театрданул оьрмулуву бакъассагу, ва иш щалагу дунияллул театрал магьирлугърал тарихран агьамсса ишну хъанахъишиву.
Дагъусттаннал тамашачитуран ххуй бивзунни Бразилиянал «Иллюзорио» театрданул спектакль – цавагу махъ хIала бакъа, анжагъ, лишаннай гъалгъа тIисса, ххютал ва циркрал кьяйдарду ишла дур­сса. Спектакль цанмасса мастер-классну хьушиврун ккалли буллай бия ссихьрал театрданул актерталгу.
Вологда шагьрулул «Теремок» театрданул ккаккан бунни цала яла язимур спектакль – «Золотая маска» премиялун лайкь хьусса «Кармен».
Хасну фестивальданул цIа куну, дунияллул премьера хIадур бувну бия ЮАР-нал «Инала» театрданул. Премьера ххал бан бувкIун бия ДР-лул культуралул министр Зарема Буттаева. Спектакль къуртал хьуну махъ Кьиблалул Африканавасса артистурал тамашачитуращал архIал щаллу бувна Лумкал балай (Лумка – спектакльданул агьаммур герой).
Волгоградуллал Ссихьрал театрданул ккаккан бунни Чеховлул «Каштанка».
Фестивальданул лагрулий Дагъусттаннал поэзиялул театрдануву ва Национал библиотекалуву хьунни Бразилиянал, Индиянал, Китайнал, ЮАР-нал магьирлугърал хьхьурду.
Хьунни Дагъусттаннал Ссихь­­рал театрданущал уртакьну зузисса художник Виктор Ни­коненкол суратирттал выс­тавка.
ОьрчIал драматургиялийн, ссихьрал театрдал кьяйдардайн багьайсса «ккуркки столданул» даврий гьуртту хьунни театрал критик, Аьрасатнал магьирлугърал лайкь хьусса ишккакку Олег Пивоваров, Аьрасатнал ПаччахIлугърал Думалул информацион технологиярттал комитетрал советрал член Александр Айгистов, Аьрасатнал Драматургтурал гильдиялул хъунама директор Юрий Бутунин, Аьра­сатнал Чичултрал союзрал член Андрей Тюняев, искусствовед Гулизар Султанова ва ДНЦ РАН-далул зузалт.
Фестиваль къуртал хъанахъи­ссар июнь зурул 1-нний. Му лакьлакьисса шадлугъ хас дантIий дур ОьрчIру буруччаврил кьинилун. Фестивальданул ахирмахъ булун тIий бур Дагъусттаннал ссихьрал театрданухьхьун. Вайннал ккаккан бантIий бур цала хьхьичIунсса спектакль, Александр Гриннул пьесалиясса «Алые паруса».