«Дагестан» РИА-лул конференц-залдануву хьунни шагьру-виричу Севастополь душманная тархъан бувну 75 шин шаврин хасну дуллалисса автопробеграл хIакъиравусса конференция.Ванияту бусласисса ихтилатру бунни Хасавюрт шагьрулул администрациялул хъунаманал хъиривчу, Аьрасатнал поисковиктурал суккушиннарал региондалул отделениялул хъунама ХIасбулла Умаровлул ва Жагьилтурал иширттал министрнал хъиривчу Сиражуттин ХIалимовлул.

---

Андриана Аьбдуллаева
Автопробегран дайдихьу дурссар май зурул 4-нний Дарбантлив хьусса элмийсса конференциялул. Шичча гьурттучитал лавгссар МахIачкъала, Хасавюрт, Грозный, Магас, Владикавказ, Нальчик, Пятигорск, Черкесск шагьрурдайх. Майрал 6-нний автомобилистурал кьюкьа дирссар Краснодардайн. Шичча бавчу­ссар Симферополлайн. Махъва-махъсса шагьрулийн ххювагу машина бивссар 7-мур майрай. АвтопробеграцIун бавхIуну гьарица шагьрулий хьуссар личIи-личIисса мероприятияртту. Махъра-махъсса мероприятие хъанахъиссар 345-мур битултрал дивизия БивкIу бакъасса полк­раву лагаву.

Автопробег хIадур дан сакин бувну бия личIи-личIисса министерстварттал, шагьрурдал ва районнал вакилтурая хьу­сса группа.
Так ца чулухуннай 1400 километра риртун дур пробеграйн бувк­миннал. Майрал 10-нний гьурттучитал махъун­май бачинтIий бур ва Ма­хIач­къалалив ца гьан­тлува биян­тIий бур.

ХIасбулла Умаровлул бувсунни автопробег дансса пикри хьушиву Симферополлай хьу­сса ца конференциялий. Ххалбигьавуртту дуллалисса суккушиннарал региондалул отделениялул хъунама хIисаврай ванахь маслихIат бувну бур 345-мур дивизиялун хас дурсса ва акция дан. 345-мур дивизиялийн халкьуннаву Дагъусттаннал дивизия чайсса бивкIун бур, Дарбант шагьрулий салкьи бувсса буну тIий. Дивизиялуву цимигу 10 азара инсан ивкIун ур, миннава 7,5% –дагъусттанлувтал, 14% – ингуш ва чачан, 26% – аьсатIин, 38% – оьрус.

-1942 шинал июнь зуруй дивизиялияту дахьва 20% аьралитурал ливчIссар. Мигу чIявуми щавурду дирсса. Мунийн бувну дивизия расформироват був­ссар. Дивизиялувасса чIявуми ятIа-тIар бакъа бакъа хьуссар. ЦIана талатавуртту най диркIсса кIанттурдай ххалбигьавуртту дуллай буссар поисковиктал. Умуд бур аьралитурал ттаркIру лякъинсса, кIул бансса. Уттинин 17 аьраличуная кIул бувну бур, цаппарасса Дагъусттаннал оьрчIал гьурттушиндарайнугу, — тIий ур ХI. Умаров.

Конференциялия зана хьуну махъ акциялул хIакъиравусса пикри дузрайн буккан баву мурадрай ванал ихтилат бувну бур Жагьилтурал иширттал министерствалул каялувчитуращал ва байбивхьуну бур ва давриха зий. Сайки 8 барз хьуну бур проект хIадур дуллай. Автопробеграву гьуртту хьун ччисса чIявусса бувккун бур, амма так 30 инсан кIункIу ан пикри хьуну бур.

Аьмну проектраву гьур­тту хьуну бур 300-нния ливчу­сса инсантал. Сиражуттин ХIа­лимовлул бувсунни проект­рацIун дархIусса харжлугъ ца­ппара инсантурал цала бакIрайн ларсшиву, проектравух «БивкIу бакъасса полк», «Юнармия» ва цаймигу жяматийсса ва патриот организациярду хIала дурхшиву.