Янил чанинияр дакIнилмур чани
хъунмасса чIумал

Апрельданул 18-нний ДР-лул БакIчи Владимир Васильев хьунаавкьунни АьФ-лул Жяматийсса палаталул кулпатран, оьрчIан ва ниттихъан кумагран­сса комиссиялул председатель, Аьрасатнал лайкь хьусса артист Диана Гурцкаящал. Му жулла республикалийн бувкIун бур цила къуллугърал аьрххилий.

МахIачкъалалив га бувкIунни янин чани чансса оьрчIал интернатрайн ва нину-ппу бакъа ливчIсса ятинтурансса 4-мур школа-интернатрайн.
— Ттун хъинну бусравсса ишну хьунни зул республикалийн бучIаву ва вищал хьунабакьаву, Владимир Аьбдуаьлиевич. ХIакьину ттун ххал хьунни ххаллилсса оьрчI-бакI – миннал ттун пишкаш бунни цалла дакIурдил парчри, нагу миннан булав ттулла къюкIлил ца парча. На бакIрайн ласав, миннал дусгу хьуну, ччя-ччяни бучIаван. Ттул ттулагу бакIрачIан чIявусса бувкIссар: къуртал бувссар укунсса, янин чани чанминнал интернат.

Ттул нитти-буттал на ду­ккин буван хIарачат бувссар. Нагу дурхIуссар къювугу, хIасратгу, амма оьрмулухсса гъира, хIарачат ххишала­сса хьунни. Мукунсса бур оьр­му. Ттун хъинну ччай бур вай оьрчIал мурадру бартлавгун. На хIакьину хIадурссара миннал чIарав бацIан, ттущава шаймур буван», — увкунни Диана Гурцкаял.
Хъамалу бувкIсса хъамитайпалухь аьла-ссаламгу бувну, Владимир Васильевлул увкунни:
— Ина оьрчIахь аьлтту бунни оьрмулуву оьрчIан аьркин­сса яла агьамми пикри-зикрирду, цалва мурадирттайн биянсса хху­ллурдая. ЖучIагу бур, ина кунмасса, захIматсса тагьарданухун багьсса инсантурал чIарав бацIан хIадурсса, миннан зузи кIанттурду дузал бувсса ва бугу-буллалисса инсантал. Барчаллагь вин ми иширттавух гьур­тту шаврихлу, жу вин, вил давур­ттан хъунмасса кьимат бишлашиссару».
Региондалул БакIчинащалсса ихтилатраву ххал бивгьунни захIматсса тагьарданий ливчIсса оьрчIан ка-кумаг баврил ва мукунма ми яхъанахъисса социал идарартту аьркинсса хъус-матахIрал дузал баврил масъалартту.
ХIадур бувссар
ХI. Аьдиловлул