[dropcap]В[/dropcap]ай махъсса гьантрай ттула дакIнийсса ххаришиву ссаярвав тIий, Гьухъалла-Къурув, Виричусса ПартIу ПатIимал гьайкалданучIа, Ниттил Аллея тIитIавриясса дия.
Ва ххаллилсса пикри дакIнийнгу багьну, чIирисса чIумул дянив дузрайнгу буккан бунни Мариян Илиясовал цIанийсса «Дараччи» фондрал ва мунил чIарав бавцIусса Илиясовхъал кулпатрал.
Ва ишираясса ттулламур ххаришиву кIилийнусса дия – ниттихъал аьпа абад буллалисса Аллеялуву лайкьсса ккуркли хъаннил – Ккурккуллал Щазал ва «Дараччи» клубрал гьану бивзния шихунмай миву чялишну гьуртту хъанай бивкIсса Сияли ХIажиевал цIа кусса мурхьру ттущава бугьан бюхъавриясса.
Цалчинсса мурхь бугьав
Ккурккуллал Щазан,
КIилчинмур – Сиялин
цIа куну бизав.
Аргъирай ххяххийча,
хъюлчай тIутIийча –
Цинявппа ниттихъал
аьпа абад бан.
ПартIу ПатIимаха
лавхьхьусса душру
Лакраву чIявусса
бушиву буслай,
БикIийча шиннардий
щай-щай тIий мурхьру,
Щюлли-хъахъи хъанай
Гьухъалла-Къурув!
Андриана Аьбдуллаева
