Ассаламу аьлайкум ва рахIматуллагьи ва баракатугьу!
Зуй Аллагьнал цIими бишиннав!
ПартIу ПатIимал гьайкалданучIа мурхьру бувгьуну, Ниттихъал Аллея бавриясса ххаришиву кIидачIлай, ца-кIира калима дан ччан бивкIунни ттунгу. Мукунсса давурттугу, ялун бурган бигьанна чIаларчагу, къабигьассар. ДакIнихтунусса барчаллагьрай бура Гульшан Хасаевайн. Ва мудангу гьарца агьамсса иширавух хIалану бур, Лаккуй, ЧIурттахьгу диялсса давурттив ванил хIарачатрайну дурссар ва дуллайгу бур.
Ниттихъал Аллеярив – му личIинура чирилунсса давур. ХIадисраву тIимунийн бувну, жува бувгьусса мурхьирдайсса чIапIал бакIрахсса чири бусса бур жунма. МухIаммад Идавсил (с.аь.с) увкуну бур: «Бусурманчунал бувгьусса мурхьирай хьусса ахъулсса дукаву – мугу хIисав бувантIиссар цадакьану, му мурхьирай хьусса ахъулсса хIатта дукарчагума – мугу бувгьуманан цадакьалун хIисавссар, му мурхьирая хIайвандалул, жанаварданул дукарчагу, мува цадакьалун хIисавссар, лелуххантрал дукарчагу, хIисавссар цадакьалун».
Ттун ттунмагу ххирар багъраву зун, кIулли захIмат къабувну цичIар къаххяххайшиву.
Хумайд-Апаннинаяту бавсса хIадисгу бур: «Мурхь бугьаврияр кьиматрайсса цичIар дакъассар. Мунил мудангу Аллагь дакIнийн утлатиссар. Жува бувгьусса гьарцагу мурхьирал гьарца чIапIухлугума чири буссар тIар».
Хъунмасса умуд бур кIай мурхьру аякьалий ябулланссар тIий, бувгьусса мурхьирдайн щин рутIавугу чирилунсса давур.
«Дараччилул» душваврал дуллалимуницIун кабакьиннав! Аллагьнайн таваккул! Амин!
Уммукусум-хIажи,
ш. ЧIурттащи
