[dropcap]М[/dropcap]ай зурул 14-нний Дагъусттаннал паччахIлугърал культуралул ва искусствалул институтраву хьунни музыкалул байран.

Имара Саидова
Шикку гьуртту хьунни Ма­хIачкъала шагьрулул культуралул управлениялул хъунама Фарид Абалаев, Дагъусттаннал Музыкантътурал союзрал председатель Хан Баширов, университетрал тарбиялул ва социал даврил проректор Полина Федотова, культурологиялул элмурдал доктор Мадина Аьбдуллаева, музыкалул инструментирттал ва балай учаврил кафедралул доцент Нина Аьбдуллаева, шагьрулул искусствардал школардал преподавательтал ва студентътал.

Фарид Абалаевлул институт­рал каялувчитурахь барчаллагь увкунни лавайсса даражалул педагогтал хIадур буллай бивхьу­сса захIматрахлу.
-Ттул ва вузращал дуссар ччянира шихуннайсса дусшиву. Шиву жу цимилгу кIицI ларгссар хъуни-хъунисса даражалул конкурсру, мероприятияртту ва личIи-личIисса байранну. Умуд бур ва институтраву вания гихунайгу ххуй-ххуйсса давуртту дулланссар тIисса, — увкунни Хан Башировлул.

Культуралул ва искусствалул институтрал директор Мадина Аьбдуллаеван Хан Башировлул буллунни Республикалул Музыкантътурал союзрал чулухасса барчаллагьрал чагъар.
Ихтилатирттая махъ ккаккан дунни институтрал студентътурал ва магистртурал хIадур дур­сса ххаллилсса концерт.