«ЛухIи душман ххит увссар»

Аьпалул вахталий бавцIунни

Май зурул 7-нний, райондалул культуралул къатрал хIаятраву, Вирттаврал аллеялуву, Аьпалул вахталий бавцIунни Ккуллал райондалулбакIчи Шамил Рамазанов, ванал хъиривми, райондалул идарарттал бакIчитал, зузалт, Ккуллал ва Лакрал районнал ца­сса Аьралий военком ХIасан Масуев, Ваччиял, ЧIяйннал школарттал дуклаки оьрчIру ва Ваччиял жямат.


Митинг тIиртIуна Шамил Рамазановлул. Мунал барча бувна райондалул жямат. Махъру лавхъуна ХIасан Масуевлул, Ветерантурал советрал председатель Аьбдул Загьидиевлул.
Гания гихуннай Ваччиял оьрчIал багъраву тарбия хъана­хъисса оьрчIал, Ваччиял ва ЧIяйннал школарттал дуклаки оьрчIал кка­ккан дуруна театрал зумунусса, дяъвилул иширттан хас дурсса, программа. Дурккуна асар бутлатисса дикломацияртту. Цаппара­сса макьгума лихьлай бия.

АхIмад-Хан Султаннун цIа кусса конкурс

Вара кьини райондалул Культуралул къатраву хьунни АхIмад-Хан Султаннул цIа абад дуллалисса балайрдал конкурс. Му хъанай дия школалул дуклаки оьрчIал ва бугьараминнал дянив личIи-личIину. ЧIалай бия сахIналул искусство ххуйну кIулшиву гьуртту хъана­хъиминнан. Мунияту захIматну бухьунссия жюрилун ххуйминнава яла ххуймагу язи угьан.
Конкурсрал ахирданий жюрилул бавчIуна укунсса кIанттурду: школалул дуклаки оьрчIаву цалчинмур – Рамазанов Расуллун (ЧIяйми), кIилчинмур – Даллаева Шагьсаланнун (Хъусращи), шамилчинмур – Хизриева Зумрутлун. Бугьараминнаву цалчинмур – Сяидова Аьйшатлун (Къян), кIилчинмур – МахIмудов Адамлун (Ккул), шамилчинмур – Мусаева РайхIанатлун ( Вихьул). Ххув хьуминнан буллуна дипломру ва администрациялул чулуха арцущалсса конвертру.

«БивкIу бакъасса полкрал» марш

Школалул дуклаки оьрчIру, культуралул зузалт ва шяраваллал вакилтал бавтIуна ЧIяйннал шяраваллил шанбачIулий дацIан дур­сса СССР-данул Виричу ЦIаххуй ­Маккаевлул гьайкалданучIан. Ва маршрай бачин бувкIминнал каруннахь дия дяъвилий гьуртту хьу­сса цала-цала гъанссаннал суратру. Бия мукунма дяъвилул чIумал кунмасса ттугъащалсса кIива «Вилис» машинагу, шанна мотоциклетгу, «Газ» машинагу.
Ссят урчIра шайхту, тIутIал чIапа бивхьуна райондалул бакIчи Шамил Рамазановлул ва райондалул Ветерантурал совет­рал председатель Аьбдул Загьидиевлул ЦIаххуй Маккаевлул гьайкалдануцI. Хъирив тIутIив дирхьуна цайминналгу.
Яла циняв марширай бавчуна, дяъвилул чIумалсса балайрдугу тIий, Ваччиял чулийнмай. Ва­ччавсса майданнив бияйхту, АхIмад-Хан Султаннул гьайкалдануцIгу дирхьуна тIутIив.
Гания гихуннай тяхъашивур­тту дарчуна майдандалул лул­тту чулийсса сахIналий ва мунил хьхьичI.
Хъинну ххуйсса концертрал программа ккаккан дуруна шяраваллал культуралул зузалтрал. Концерт дачин дурну ия Хъусращиял халкьуннал театрданул режиссер Марсел Сулайманов.
Шиккува чара бакъа кIицI бан ччива вай тяхъашивурттавух гьур­тту хъанай бивкIшиву оьрчIал ба­гъирдавун заназисса оьрчIругу. Вихьуллал оьрчIал багъраву тарбия хъанахъисса оьрчIал хъинну дюхханну дурккуна «ЛухIи душман ххит увссар» тIисса назму, на вай махъру ласав ттула макьалалул бакIрайнгума.

Репортаж хIадур дурссар
ХIажимурад ХIусайновлул