Роспотребнадзорданул Управлениялул пишакартал хъунмасса тавакъю буллай бур агьалинахь менингококкорал инфекциялия личIлулну бикIияра тIий. Халкьуннаву му азарданийн кутIану «менингит» учай.Му хъинну жапасса, цIубакIрай бявкъу-гъили хьуни куннасса симптомру дусса, лахъай азарди. Ларгмур шинал жулла республикалий му азарданул къашавай хьусса 18 иш хьуну бивкIун бур. Ганияр хьхьичIсса 2017 шинал тIурча, 15 къашайшала сияхIрайн лавсун ивкIссар.

---

З. АьбдурахIманова
Гьашинугу, мисалдаран, шин дайдирхьуния шиннай 9 инсан къашавай хьуну ур му азарданул, миннавагу ттинин 3 ивкIуну ур.
Ва азар лархъсса чIявуми къашайшалт бусса бур МахIач­къалалиясса, Каспийскалиясса, Ахъушиял, УнцIукIуллал, Къизлардал ва Къизилюртуллал районнаясса.

Вана вай гьантрайгу, апрельданул 4-нний, Къорхъмаскъалаллал шяраву 3 шин хьу­сса оьрчI ивкIуну ур ва лахъай азар сававну. ХIакинтурал бусаврийну, оьрчI къашавай хьусса цалчинмур кьини ганал кIиришиву 39,9 градусрайн лархъун дур. Нитти-буттал, хIакинтурайнгу къаоьвкуну, «Нурофен», «Цификон» тIисса даруртту буллай, кIиришиву лагь дурну дур. Цахъи хIаллай кумаггу хьуну, кIюрххицIун цIунилгу кIиришиву гьаз хьуну, «Анаварсса кумаграйн» оьвчин багьну бур.

[pullquote]Гьашинугу, шин дайдирхьуния шинай 9 инсан къашавай хьуну ур менингококк азарданул, миннавагу ттинин 3 ивкIуну ур.[/pullquote]

Республикалул оьрчIал азарханалийн чIивитIу увцуну бувкIсса чIумал ганал вичIайх, лажиндарайх ятIулсса тIинхьру дирчуну диркIун дур. Анаварсса мутталий анализру дуллуну, кIул бувну бур ганай менингококк­рал азар душиву. Му иширацIун дархIусса хIакинтурал хъиривлаявурттал чIалачIи бувну бур ганиннин оьрчI цайми шагьрурдайн ва шяраваллавун къаувцуну ивкIшиву ганал нитти-буттал. ОьрчIал чIарав ивкIсса 44 инсан сияхIрайн лавсун, гайннайн прививкартту дурну дур.

Роспотребнадзорданул пишакартал тавакъю буллай бур республикалул каялувчитурахьгу, ДР-лул ЦIуллу-сагъшиврул министерствалухьгу ва азар ппив хьун къаритансса чаранну лякъияра, анализру дувай­сса лабораторияртту аьркинсса оборудованиялул щаллу бувара тIий. Прививкардая нигьа къабувсун, ми чара бакъа дувара тIий, оьвтIий бур агьалинайнгу, хIакинтурайнгу.