Гьашину гъинттул республикалул оьрчIал лагерьдай 17 азара дуклаки оьрчI игьалагантIишиву баян бунни Дагъусттаннал БакIчинал ва ХIукуматрал администрациялул пресс-службалул.
П. Рамазанова
«ОьрчIру ххуйну бигьалагаврин гьашину республикалул бюджетрава 227 миллион арцул ккаккан бувну буссар, аьмну 17 азара дуклаки оьрчI игьалаган аьркинссар. Му бакъассагу, 455 оьрчI игьалагантIиссар федерал центрдай, Къиримнаву «Артек» лагерьданий ва Краснодардал крайрайсса «Орлёнок» ва «Смена» лагерьдай.
Вай лагерьдайн оьрчIру тIайла буклакиссар федерал бюджетрал харжирацIух», — бувсунни кIулшиву дулаврил ва элмулул министр Уммупазил Оьмаровал, оьрчIру бигьалагаврин хас дурсса заседаниялий. Ванила бувсунни уттинин заявкарду дуллушиву шагьрурдая архсса 29 лагерьданулгу, школардачIасса 56 идаралулгу. Шагьрурдая архсса лагерьдай ца сменалий дянивну 8130 инсан игьалагайсса ур, школардайсса лагерьдай – 5830 инсан. Лагерьдайнсса путёвкарду кIани-кIанттурдай МФЦ-дайхчIин тIалав дуван шайсса дур. ДукIугу путёвкарду, дула-ласавриву низам дикIаншиврул, МФЦ-рдайхчIин ласай дурну диркIун дур, вара низамрай ласлантIий бур гьашинугу.
Дагъусттаннал вице-премьер Артём Здунов чIурчIав дуллай ур, оьрчIру бигьалаглагийни хъунмур къулагъас миннал мюхчаншиву дуруччаврих дикIантIишиву ва мунил жаваб дуллалисса структурарду уттира хIадур хъанан аьркиншиву. Ванал тапшур бунни лагерьдайн ласласисса дуки-хIачIиялул ялувбацIавугу дуван паччахIлугърал закупкардалсса буллалисса комитетрайн.
