Дяъвилул балайрдал фестиваль
Хъун дяъвилий Ххувшаву ларсун 74 шин шаврин хасъсса Респуб­ликалул V конкурс-фестиваль хьунни Ма­хIачкъалалив.Ва хъанай дур Аьрасатнаву дуллали­сса Бу­ттал кIанттул цIанийсса Хъунмасса дяъвилул балайрдан хас дурсса ду­ссарагу ца конкурс-фестиваль.

Ветерантурал суратру – укра
Дарбантлив рекламартту лахъай щитирдайн лархъунни Хъун дяъвилул гьурттучитурал суратру. Ва хъанай бур щалагу Аьрасатнаву фронтовиктурал суратру билбордирттай укра лархъсса буссавагу ца шагьруну. Акциялул сиптачину увккунни ДР-лул Жяматийсса Палаталул член Шуми Шабатаев.

Дагъусттаннаясса журналистка – хьхьичIун­миннавух
Избербаш шагьрулиясса чIава журналистка Амина Таймасова хьунни «Агана на ивкIссания президентну» тIисса щалагу Аьрасатнал конкурсрал призер.
Ва конкурсравух гьуртту хьуну бур Аьрасатнавасса 35 азарунния ливчусса дуклаки оьрчIру ва студентътал, миннава 3 азара увккун ур финалданийн.

Амина Таймасова зий бур «Жула Избербаш» тIисса кказитрай. Конкурсрайн ванил хIадур дурну дур видеоролик, цивугу бусласисса, агана цуппа АьФ-лул президент бивкIссания, ци давуртту дуван най бивкIссарив. Амина лайкь хьуну бур Аьрасатнал паччахIлугърал властьрал федерал органнаву стажировка дувансса сертификатран.

Композиторнан цIа кусса ула
МахIачкъалалив, Набережная кIичIираву, тIиртIунни, Дагъусттаннал хъунасса композитор Наби Дагировлун цIа кусса мемориал ула. БатIаву хьуна композиторнал къатрацI. Дагиров дакIнийн утан, мунаясса аьпалул махъру учин бавтIун бия рес­публикалул министерстварттал, шагьрулул администрациялул, творчествалул интеллигенциялул вакилтал, композиторнал мачча-ляхъин.

Ххувшаврин хасну – шахматирттал турнир
МахIачкъалалив Бюхттул­сса Ххувшаврил кьинилун хасну хьунни шахматирттал турнир. Му сакин дурну дия шагьрулул шахматирттал федерациялул ва Карповлул цIанийсса шахматирттал школалул.
Ва турнир дувайссар гьарца шинах. Гьашинугу ванивух гьуртту хьунни ветерантал ва шахматирттай буклан ххирами.
Ххув хьуми лайкь хьунни грамотарттан ва медаллан ва «Единая Россия» партиялул отделениялул чулухасса арцуйнусса бахшиширттан.

Жула мюрщи балеринахъул – язиминнавух
Уттигъанну Москавлив хьусса «Рассвет России» ва «Страна побед» цIанилусса дунияллул халкьуннал дянивсса конкурсирттай-фестиваллай ххув хьунни Дагъусттаннаясса чIава балеринахъул – «Glissade» ансамбль.
Вай бяст-ччаллавух гьуртту хьуссар билаятрал 37 региондалиясса 60-нния ливчусса коллек­тивру, мукунма чил билаятирттаясса коллективругу. Конкурсрал жюрилуву бивкIссар СССР-данул халкьуннал артистка Мира Кольцова, Аьрасатнал лайкь хьусса артист Владимир Кирсанов ва м.ц.
Конкурсрай шанна къавтIаву (классикалулсса, эстрадалулсса, эстрада-балданул) ккаккан дур­сса жулва чIава балеринахъул лайкь хьуссар 1,2,3-мур даражарттал дипломирттан ва фестивальданул Кубокран.

Пластикалул тIахIни-кIичIу ишла къадуллан

АьФ-лул ТIабиаьтрал сурсатирттал ва экологиялул министерство тIалав буллай бур цал ишла дувайсса пластикрал тIахIни-кIичIу дахлахаврия ва ишла дуллалаврия махъунмай шаву. Министерствалий хIадур буллай бусса бур мунил хIакъиравусса хIукму.
Евросоюзрал мукунмасса хIукму бантIий бур 2021-ку шинал.

Каспийлул рак ЯтIул луттирая букьан бунни

Дагъусттаннал ЯтIул луттирая букьан бувну бур Каспийлул рак, миннул ккал хъунна шаву хIисавравун ларсун. Каспийлул тюлень тIурча, ялунмагу хъиннува цIакь бувну бур ЯтIул луттирай, ми ялу-ялун чан хьуну най бушиврийн бувну.

ХIадур бувссар
Бадрижамал Аьлиевал