Ина жул дакIурдива тачIав къабуккантIиссара

Гъумучиял школалул 51-мур выпускрал оьрчIру. 1990-ку шиналсса 11 «б» класс

Лавхъунни мукьцIал жул ххирасса учительница, жул классрал каялувчи Багъдуева Алла Ивановна аьпалул хьуну. Гъумучиял дянивмур даражалул школалий жул класс (1990-ку шин. 11-мур «б» класс.Гъумучиял школалул 51-мур выпуск) бия Алла Ивановнал каялувшиву дурсса махъва-махъмур класс, жуяр гихуннай мунил классрал каялувшиву кьадиртуна.

Ганин жу хъинну ххираяв, жунгу ганиха чIалачIин къадикIайва. Жухьва «зуяр тихунмай цамур класс къаласунна каялувшиврулун, зуй бацIанна» тIисса чIумал, жугу, эгоистътал кунма, маласара цамур класс тIий, рязийну бикIайссияв. Гьарца нюжмардий жу муничIа шаппа шайссияв, мунил бувсса нахIува-нахIусса ххюлтIурдахун чяй хIачIлай, ца хъунмасса кулпат кунма, лагма лавгун.
Жу пахрулий буру жува Алла Ивановнал учениктал бушиврия. Ва жун анжагъ муаьллим бакъая, ва бия жун оьрмулул маслихIатчигу, кIилчинмур нинугу.

Школалия махъсса шиннардийсса хьунабакьаву

Жул классрал оьрчIал Алла Ивановнал каялувшиндаралу Гъумучиял школалий гьан дурсса цала оьрмулул шинну ккалли дувай га яла ххуймур чаннамур чIумун. Ванил хIарачатрайнуя жул класс дуккавривугу, школалул ва райондалул жяматийсса оьрмулувугу хьхьичIунминнувух бивкIсса. Ванил хIарачатрайн бувнуя жул классрава шама медалист (Айгунов Жамалуттин, Багъиров МахIаммад, МахIаммадов Тамирлан) увкссагу.
Алла Ивановнал жухь, химиялул дарс дакъасса, дишайва га чIумал цIуну дурксса этикалул ва кулпатравусса оьрмулул психологиялул дарсгу. Мунил дихьлахьисса дарсирдайн, цумур дунугу, жу байрандалийн кунма бачай­ссияв. Хъиннура хIазну ва дахха-дахханасса темардайну лагайва мунил дихьлахьисса классрал ссят­ругу.

Москавлив Алла Ивановнащал

Жул классрал хьхьичIунсса кIанттурду бугьайссия райондалул ва республикалул школарттал дянив хъанахъисса личIи-личIисса бяст-ччаллавугу. Мукунми аьр­ххирдава жун яла-яла дакIний лирчIунни Щардал школалущал­сса ва Гъуниннал школалущалсса хьунабакьавуртту.
Ца чаннасса, ххуйсса макI кунмасса, оьрмул оьрмулухун хъама­къабитансса асардал бувцIусса хьуна жул Ленинградрайнсса (цIанасса Санкт-Петербург) экскурсия. Гъумучиял колхозрал председатель МахIаммадов Оьма­рищал икьралгу дурну, жущал архIал цуппагу колхозраву зий, ххулув батIлай, ххалабакIурду буллай, цайми-цайми давурттив дуллай, ца-кIира шинал дянив жура ляркъусса арцуцIух 1990-ку шинал инттухунмай жу Ленинград­райн бувцуссияв Алла Ивановнал. Зува пикри бувара, дунияллул шагьрурдаву ца яла ххуймунин ккаллисса Ленинградрайн ва Аьрасатнал къюкIлин ккаллий­сса Москав шагьрулийн бивсса, 16-17 шиннардивусса, оьрчIал дакIру цуксса дакъахьунссия, асарду цуксса гужсса бакъахьунссия!?

Путевкалий ккаккан дурсса кьинирду каникуллу дакъасса чIумуйн дагьлай дуну, Алла Ивановнал директорнащал икьрал дурну, жу каникуллал чIумал дарсирдайн занай бу­ссияв, дарсру къаличIан. Миксса аварарттугу бувну, муксса хъунна­сса жаваблувшинна цийнна ларсун дия Алла Ивановнал – жун дуниял ккаккан дуван.
Алла Ивановнал жул классращал дуллалисса давурттаву кумаг буллай, жул классрал оьрмулувух хъинну гьурттуну бикIайва мунил душ, ларайсса кIулшивугу ларсун, аьзизсса Гъумучиял школалийн учительну зана хьусса Алена Багъдуевагу. Жагьилшиврул ва щугълурдал аргъираву Аленал оьр­му бяливчIуна. Муния­сса аьпагу жул дакIурдиву муданмагу уттавассар. Мукунсса дард-къюву духIан багьну махъгума Алла Ивановна цивунма цуппа къалавгуна, мунин ччай бикIайва жу цила чIарав буну, ххирая жущал архIал Алена дакIнийн бутлан, га гьур­ттуну хьусса ишир­ттая ялагу-ялагу буслан.

Алла Ивановна кунмасса учительтурайнни учайсса «Заннала учительну ляхъан бувми» куну.
Жулгу, жу кунмасса, щалла дунияллийх кIама бив­­­­щусса, чIявусса цайми оьр­чIал дакIурдивагу ина тачIав къабуккантIиссара, ххира­сса Алла Ивановнай. Вил рухI бигьаний, чурх куклуний хьуннав.
Гъумучиял школалул 51-мур выпускрал оьрчIру.

ХIадур бувссар
Бадрижамал Аьлиевал