Бизнесрал форумрай гьуртту хьунни сайки 400 инсан

Майрал 25-нний МахIачкъалалив «Россия – моя история» музейраву хьунни ишбажаранчитурал форум.Бизнесрал аралуву хьусса му хъунмасса иширай гьуртту хьунни сайки 400 инсан. ЦIу бутIуй форумрайн бувкIминнал ххал дунни ишбажаранчитурал цалла хъус-матахI ккаккиялун дирхьусса затру.


Форумрай махъ лахълай, ДР-лул ХIукуматрал Председательнал цалчинма хъиривчу ХIажимахIаммад ХIусайновлул циняв ишбажаранчитурахь барча кунни пишакаршиврул байран.

-Гьашину жура республикалул инвестициярттал программа гьарта-гьарза дарду 7 млрд. къурушрал, яни арцул жям гьарза хьуссар ххюлийну, дукIумур шинах бурувгун. Жува байбивхьуру буллай 18 школа, 22 оьрчIал багъ, 4 цIуллушиву дуруччаврил объект, 2 спортрал объект, дузрайн дуккан дуллай буру республика щинал щаллу даврил программа, дуллай буру администрациялул къатри, шяраваллавун буцлай буру газ, дуллай буру цаймигу давуртту – вай гьармур дузал дуван бюхълай бур зул хIарачатирттацIух. Зул кумагирттайну жущава бюхълай бур дузрайн дуккан дуллан хъунисса проектру. ЧIиримур ва дянивмур ишбажаранчишиву ччянияцIара хьуссар республикалул экономикалул ца бутIану, — увкунни ХI. ХIусайновлул.

Бизнесчитурахь ялун нанисса байран барча кунни ДР-лул ишбажаранчитурал ихтиярду дуруччаврил вакил Мурад ТIалхIатовлулгу.
Бизнес-ккурандалул цIанияту ихтилат бунни «Опора России» ДРО-лул хъаннил ишбажаранчишиврул комитетрал каялувчи Зулгимар Тагибова-Рачинскаял, «Дагестан» бизнес-клубрал каялувчи Марина Жанбулатовал ва цайминналгу.

Аьрасатнал Ишбажаранчитурал кьинилул хьхьичIми гьант­рай МахIачкъалалив хьунни ишбажаранчишиврул нюжмар.
Дагъусттаннал ишбажаранчишиврул ва инвестициярттал агентствалул личIи-личIисса кIанттурдай сакин бувну бия ккуркки столлу, тIиртIусса нузал кьинирду, бизнес-тIуркурду, бизнес хьунабакьавуртту, мастер-классру.

ХIадур бувссар
ХI. Аьдиловлул