[dropcap]М[/dropcap]айрал 12-нний, алхIат кьини, ДР-лул БакIчи Владимир Васильевлул дурсса батIаврий ххал бивгьунни тIабиаьтрал ляличIисса тагьарданул биян бувсса зараллал ва ми бухлаган баврил масъалартту.
Зараллу хьусса районнал ва шяраваллал тагьардания ихтилат бунни ДР-лул МЧС-рал каялувчинал хъиривчу Олег Халиловлул. Мунал тIимунийну, Агвали ва Шаури шяраваллал дянивсса ламу уттигу щинаву бур, мунияту давуртту дайдишин бюхълай бакъар. Оператив ккаккиярттайн бувну, Гумбетуллал райондалий зарал бивну бур 111 къатлун, тикку зий бур 4 комиссия, тиккува зий ур 20 ххассал буву. ЦIунтIиял райондалий техника зий дур, ххуллурду марцI буллай бур.
Райондалий зарал бивну бур 157 къатлун. Щинал щаллу байсса система дакьин дурну дур, къатравун щин нани дурну дур.
ЦIунтIиял ва Гумбетуллал районнайн токрал ххаллу дарзуну, жямат энергиялул дузал бувну бур.
Ххуллурдал тагьарданул хIакъираву бавтIминнахь бувсунни ДР-лул транспортрал ва ххуллул хозяйствалул министр Ширухан ХIажимурадовлул. Мунал тIимунийну, ххуллурду бакьин буллай бур.
ДР-лул Роспотребнадзорданул каялувчи Элеонора Оьмариевал бувсунни зараллу хьусса шяраваллаву санитар-эпидемиологиялул тагьардания. Ми кIанттурдай эпидбригадалул дуллай бур эпидемиялийн къаршисса давуртту, мукунма вакциналул ххалаххивгу. Агьалинахь маслихIат бувну бур ишла дуллан щаралархъсса ягу ттучаннай дахлахисса шушравусса щин. Шяраваллавун ххилай бур марцIсса хIачIайсса щингу.
КIирагу райондалул шяраваллал бакIчитурайн тапшур бувну бур хасъсса комиссиярттащал цачIу майрал 17-нин тIабиаьтрал биян бувсса зараллал кьимат бищун.
ХIадур бувссар
ХI. Аьдиловлул
