Ххувшаврил гьантрай Дагъусттаннал медициналул университетрал ректорат, муаьллимтал ва студентътал бавтIун бия Хъун дяъвилий жанну дуллусса медициналул вузрал зузалтран ва студентътуран дацIан дурсса обелискрачIан. Бадрижамал Аьлиева
БатIаву тIитIлай, ДГМУ-лул ректор Сулайман Маммаевлул лавхъуна махъ:
— Ххувшаврил кьини – му дур жулва билаятран ца яла агьаммур, ца яла чаннамур кьини, жура гьарца шинал мукьал бувцIусса яруннащал ва чаннасса бучIантIимунийнсса хьулданущал хьунадакьайсса байран. Та яла оьхIалмур, инсаният­рал тарихраву яла инсаншиву дакъамур дяъвилия махъ ларгун дур 74 шин.

Санитартурал, медсестрахъал талатаврил майданная цала хъачIунттай буккан буллай бивкIссар щаву дирми. Аьралий хIакинтал хьхьугу-кьинигу талай бивкIссар саллатIнал оьрмурдахлу. Шагьрурдайн тIайла бувксса къашайшалт щаллуну хъин буллай бивкIссар эвакогоспиталлай. 1942-ку шинал Дагъусттаннал медициналул институтрал 5-6-ми курсирдал студентътал тIайла бувкссар фронтрайн.
Ххирасса жагьилтал, зуру жул­ва билаятрал бучIантIимур. БучIантIимур бюхттулсса къаби­кIантIиссар, агарда жучIава тарихрал ва аьпалул кьадру бакъахьурча, — куна ректорнал.

БатIаврий мукунма ихтилатру бувна ДР-лул Халкьуннал Мажлисрал депутат Зумруд Бучаевал, ДГМУ-рал 1-мур отделданул начальник Ися Жаватхановлул, шагьрулул вивсса округрал депутат Елена Кожухинал, цачIун був аьралуннал ветеран Гьарун ХIасанхIусайновлул ва м.ц.
ГьайкалдануцI тIутIив дирхьуну махъ ДГМУ-лул Культуралул центрданул ккаккан дуруна аьрали балайрдал ва къавтIавурттал концерт.
Шиккува ххи бан, Медунивер­ситетрал хъунмасса делегация гьуртту хьунни Ххувшаврил кьинисса парадрайгу, «БивкIу бакъа­сса полкрал» кьюкьлувухгу.