ЦIуну буллалисса мизитраву – лакрал кьини

МахIачкъалаллал ва Каспийскаллал дянив буллалисса Ися Идавсил (а.с) цIанийсса РувхIанийсса комплексраву ларгсса тталат кьини лакрал кьини дия.Гьаннайсса, шаннагу райондалия цачIун хьусса лакрал чиваркI ца хьуну зий булувкьуну бия. Ца ттугълилу.


ПатIимат Рамазанова
На ахттайн чак буваннин бивссияв ти­кку зузисса лакрачIан, 66-67 инсан ия шаннагу райондалия увкIсса, ялун букIлайгу бия. ЧиваркIуннал кьюкьлуву ия Кисловодск шагьрулия увкIсса лакрал миллатрал язисса арс, Гъумучатусса Аьлил АхIмадовгу. Бия Муфтиятрал просвещениялул отделданий каялувшиву дуллали­сса МухIаммад Ссаламов ва Лак­рал райондалул имам МухIаммад- Маннар Бариевгу. МухIаммад Ссаламовлул бувсунни Мадиналийсса Идавсил (с.аь.с) мизитраха лав­хьхьусса мизит бувавриву лакрал агьалиналгу биялсса бутIа бивхьушиву ва хIакьинусса кьинигу лак чялишну гьуртту хъанай бушиву.

«ХIакьину ва кIанай зий бур Вихьлияту, Ккулату, Щарату, Ваччату, Кьубату бувкIсса жагьилтал, сайки гьарца шяраваллил вакилтал бур. Ва дуллай дайдишайхтура халкьуннал стройка хьусса даву дур, яржа бивхьуну гьарцагу райондалия бучIайссар шикку зун. Ва даврилгу Дагъусттаннал агьлу цачIун бунни. ДакI ххари хьунсса иш бур Сайпуллагь Кьадинан ва Щайх Жамалуттиннун цIа кусса чIулттив лайкьсса даражалий, дюрхъуну дувавугу. Уттигу лакрал дуван бакIрайн ларсъсса давурттив дуссар, кумаг буван ччиминнаща хьунтIиссар арцу тIайла ду­ккан Сбербанкрал карточкалийн : 54 69 6000 29999 562( Аьбдул Оьмаев)».

Шикку ва кьини зузиминнавасса жагьилтурал, КIундиятусса Аьли- АсхIаб Массуевлул ва 1-мур ЦIувкIратусса Аьду­рахIман Аьбдуллаевлулгу бувсунни цивппа ххарину бушиву гьамин Мубараксса Рамазан зуруй зунсса хIалу дагьаврияту.
Зу бивхьусса захIмат АллагьначIа бучIи лякъиннав, лакрал уздансса чиваркI! Дурсса ва дуллалисса даву чирину тIайла дацIаннав!