Севастополлай АхIмад-Хан Султаннун гьайкал тIитIлатIисса шадлугърай – цIувкIулгу

Севастополь душманная мурахас бувну 75 шин хъанахъисса гьантрай Къиримнал Кача тIисса шяраву машгьурсса совет лётчик,СССР-данул кIийла Виричу АхIмад-Хан Султаннун гьайкал тIитIлатIисса мажлис хьунни.

ПатIимат Рамазанова
Агьали барча буллай, Севастополлал губернаторнал хъиривчу Илья Пономарёвлул бувсунни ва шяраву, 1940 шинал, аьрали авиациялул школа къуртал бувшиву Виричунал ва, шиккусса агьалинащал хьунаакьин Севастополлал губернатор Дмитрий Овсянников учIайхту, миннал миннат бувшиву летчик дуклай ивкIсса шяраву гьайкал дацIан дуван. Бюст бувну бур «Аллея Российской славы» проектрал лагрулий, Аьрасатнал лайкь хьусса художник, Аьра­сатнал Художествалул Академиялул член-корреспондент Салават Щербаковлул проект­райн бувну.

Ва шадлугърай гьуртту хьунни 1-мур ЦIувкIратусса СантIуевхъал кулпатгу: уссур­вал МахIаммад- Башир ва МахIаммад- Рамазан кулпатирттащал Эленнущал ва Заиращал. Таможнялул къуллугърал полковник МахIаммад- Башир СантIуевлул бюххансса ихтилат бувшиву чичлай бур къиримнал кказитирттай. Ванал цалвамур ихтилатраву кIицI лавгунни гьар шинал Ххувшаврил байрандалий Дагъусттаннал агьлу МахIачкъалаливсса Виричунал гьайкалданучIа батIайсса аьдат Севастополлайгу цIакь хьунтIишиврий дакI дарцIуну ушиву.

Бувсунни бусалардавун агьсса летчикнал цIанил цIакьгу, биялагу Дагъусттаннай бюхттулну бушиву.
«Къиримнал агьлу хъинну ххуйну хIадур хьуну бия, духовой оркестр бия. БавтIминнавух генералталгу бия. Дуклаки оьрчIал ва аьрали авиациялул школий дуклакиминнал ххуйсса программа хIадур дурну дия. Жу Алупкалийсса Виричунал музейравун лавгсса кьини кIул хьуссияв музейрал директорнащал, ванил жуйн оьвкуна гьайкал тIитIаврил шадлугърайн. Жун тIааьнну бур жула арс Зайдхан Виричунал цIанил хIурмат бюхттулну ябуллалисса Къиримнаву, Симферополлал медициналул академиялуву, дуклай ушиву. Гъанну кIул хьуру, дустал хьуру Къиримнал агьулданущал, дакIниву пахрулул, ххаришиврул асарду бия Виричунал цIа зумату щяв къадихьлахьисса тагьар чIалай. Виричу увсса кьини, октябрь зурул 25-нний, Симферополлай дацIан дувансса гьайкалдануха зий буссар тIий бия», — буслай бур ДГПУ-рал доцент, филологиялул элмурдал кандидат Элен СантIуевал.