Къизлардай тIивтIунни ппиринж лази-лакьи байсса завод

Майрал 15-нний ДР-лул БакIчи Владимир Васильев гьуртту хьунни Къизлардал райондалий Сар-Сардал шяраву ппиринжрал ккурпа байсса ООО «Нива» тIисса завод тIитIаврий.Ва предприятие хъанахъиссар Ухссавнил Ккавкказуллал федерал округрай ца яла хъунмур, ттизаманнул техникалул дузал бувсса завод. Ванил сурсат дахлантIиссар сайки 60 ппиринж бугьайсса хозяйстварттан.

Заводрал зузалтрал хьхьичI махъ лахълай, региондалул каялувчинал бувсунни республикалул ппиринжбугьултрал хьхьичIуннайшивурттая: «Махъсса 10 шинал мутталий ппиринж бугьайсса хъуру гьарза хьуссар 2,5-лийла. ХIакьинусса кьини ппиринж бугьлай бур 19 азарунния лирчусса гектардай, мунил бакIлахъия ласлай бур 81,9 азарда тонна, ца гектардания 42,6 центнер хIисавну. Аьмну республикалий дур ппиринжрал хъуруннал (чекирдал) 46,1 азарда гектар, амма миннул дачIиссаннуй бугьлай бур ппиринж – щин диял хъанай дакъар».

МуницIунма Владимир Васильевлул бувсунни республикалул мелиоратив комплексран кабакьу баврил хIакъиравугу. «Ппиринжрал чIяруми хъуру дугьлай бур Къизлардал райондалий, мунияту жу зун кумаг банну мелиорациялул давуртту дуллан, хъуруннавун щин дихьлан бюхъаншиврул», — увкунни Республикалул каялувчинал. Владимир Васильевлул тIимунийну, хIукму хьуну бур гьашину мелиорациялул давурттан республикалул бюджетравату личIи дуван 500 млн. къуруш. Миннувату 200 млн. къуруш личIи дантIиссар Къизлардал райондалул мелиорациялул давурттан.

Ихтилатру бунни мукунма Къизлардал райондалул бакIчи Александр Погореловлул ва ООО «Нива» заводрал директор Загьидин Кьасумовлул.
Яла шадлугърал тагьарданий кьуркьунни ятIул лиссугу. Муния махъ ДР-лул БакIчинал ва мунащал архIал бивзминнал ххал бунни цIусса заводрал хIалкьазия.

ХIадур бувссар
ХI. Аьдиловлул