КВН-щиктурал къахъярчийсса хъуннасса даву

Майрал 1-нния тиннай жулва билаятрал кинотеатрдаву кка­ккан дуллан бивкIунни «Спасибо деду за Победу!» цIанилусса комедиялул журалийсса фильм.Мунил автортуращал­сса, мунивух гьурттуну бивкIминнащалсса хьунабакьаву хьунни утти­гъанну «Дагъусттан» РИА-лий.

Теймураз Тания, Оьмар Аьлибуттаев, ХIажимурад Набиев дяъвилиясса кинораву


Бадрижамал Аьлиева
Пресс-конференциялий гьур­тту хьунни фильмрал автор, режиссер, сценарист, агьамми роллавасса ца дургьусса Теймураз Тания (буккултрава чIявуминнан ва кIулссар КВН-лул «Нарты из Абхазии» командалува), автор ХIажи Атаев (КВН-лул «Сборная Дагестана» командалувасса), актертал Оьмар Аьлибуттаев (КВН-лул «Сборная Дагестана» командалувасса) ва ХIажимурад Набиев (КВН-лул «Махачкалинские бродяги» командалувасса).

ЧIявуминнан бюхъай пикри хьунгу, хъярчру буллалисса, къабунияласса КВН-щиктураща ххишала бакъа бунияласса Хъун дяъвилиясса ци кинори ласун бю­хъайсса тIисса. Теймуразлул бувсунни ва фильм сивсуну ккалли дуван бюхъайшиву автобиографиялул фильмран, сюжетрал гьанулун лавсъсса тарих цалва кулпатраву хьусса иш бушиву. Ва фильм ласунсса пикри хъинну хъунмасса хIаллай бакIраву щурущи бувну ивкIун ур ва. Уттинин цайми кинордавух гьурттуну ивкIхьурчагу, хасну ва пикри щаллу баншиврул Теймуразлул къуртал бувну бур режиссер шайсса курсру.

Муния махъ ХIажи Атаевлущал сценарийлул ялув пикри буллай, зий дачIи шин дурну дур. Теймуразлул ва фильмраву дургьуну дур жагьилнийсса цала ттаттал роль.
— Му дугьаншиврул, ттун 12 килорал илтIа хьун багьуна, цанчирча хIакьсса абхазнай чаргас кIичIру бувкIун бикIан аьркинну тIий. КIичIру ххуйну къабучIарчагу, лавай лавсъсса ссихI махъунмай ласун захIмат хъанарчагу, цукун-бунугу бучIан бювхъуна», — хъяй, буслай ур Теймураз.

Дагъусттаннал жагьилтал ва фильмравун цукун багьссар тIи­сса суалданухун, Теймуразлул бувсунни шивусса цаппарасса роллу хасну миннан ку­сса кунна чирчуну диркIшиву. Мисалдаран, Гитлердул рольданий ХIажимурадлуяр авкьуну цама къаикIантIишиву, мунияту цаманал пикривагу къабувшиву, шяраваллил оьрчIал рольгу Оьмар­дуща кунна ххуйну дугьан щищакIуй къахьунтIишиву.

Ва фильмравусса цалламур гьурттушиндарая кказитрал бу­ккултрахь ялунсса цания-ца номерданий бусантIиссар жула лакку оьрчI Оьмар Аьлибуттаевлул.