[dropcap]Л[/dropcap]акрал жагьилтурал ккурандалул ирглийсса батIаву хас дурну дия 1960-ку шиннардий Дагъусттаннал волейболданул цачIундур командалул капитанну ивкIсса Нуруллагь ОьмаровлулцIанийсса заварду ласавринсса «Гъази-Гъумучи» Кубокрал ттуплий буккаврил турнирданун.
Имара Саидова
Апрель зурул 14-нний ЦIуминалийсса ЦIуссачIурттащиял шяравусса спортзалдануву дайдирхьуссар му турнир.
Хьунабакьаврийн бувкIун бия турнирданий гьуртту хъанахъисса лакрал щархъавасса 20 командалул капитантал. Турнирданул тIуркIурдал низамраягу бувсун, кIунурду бивчуну, цумур команда цумунищал данди дуккантIиссарив баян бунни жагьилтурал ккурандалул каялувчи Давуд Аттаевлул.
Жагьилтурал дуллалисса даврицIун кабакьу бан ва чIарав ацIан увкIун ия цува Нуруллагь Оьмаровгу. Ххув хьусса командарттансса завардан ккаккан дунни 300 000 къуруш арцул.
[dropcap]Ш[/dropcap]яраву школалий, ва яла шагьрулий Шяраваллил хозяйствалул институтраву дуклайсса чIумалгу волейболданий уклан хъинну гъира бусса жагьил ивкIун ур. Нуруллагь ацIрахъул шиннардий ивкIун ур Дагъусттаннал цачIун дур командалул капитанну. КIира шинай ванал каялувшиву дуллалисса «Урожай» тIисса команда РСФСР-данул цачIун дур командалувунгу духлай диркIун дур.
Турнир дуллалисса баяйхту, хIала бувххунни ва чIарав бавцIунни МахIачкъала шагьрулул спортрал, туризмалул ва жагьилтурал иширттал комитетгу.
Апрель зурул 28-нний МахIачкъалалив Автоххуллурдал техникумрал колледжраву, бусравсса хъамаллурайнгу оьвкуну, хьунтIиссар «Гъази-Гъумучи» волейболданул кубокрал турнирданул хIасиллу дуллалисса батIаву.
