КIиттуршлий мяйцIаллий кIива аьпалул мурхь

Ларгсса ххуллункьини, биялсса агьалигу бавтIун, ГьунчIукьатIрал шяраву хьунни Буттал КIанттул цIанийсса дяъвилий гьуртту хьуминнан цIа кусса «Аьпалул аллея» тIитIлатIисса мажлис.

Зулайхат Тахакьаева
Му бусравсса ва тарихраву чивчуну личIансса акциялул сиптачину хьунни «ГьунчIукьатIи цIу буккан баву» тIисса жяматийсса регионал организация, ванил правлениялул председатель ХIажибутта ХIусайнов бакIчину.
Мурхьру бугьансса ва миннул лагма чапар дансса арцу шяравучутурал рартIун дур цала хушрай. Вания тихуннайгу ратIлантIий бур миннуха къуллугъ буллансса харжлугъран.


ГьунчIукьатIрал шярава Ватан дуруччин Хъун дяъвилийн лавгун ивкIун ур 282 инсан. БачIисса ливчIун бур дяъвилул майданнай. Зана хьуминнавату­сса махъа-махъсса ветеран Жамалуттин Ибрагьимов ларгсса шинал батIул хьунни жуятува.

Ларгсса ххуллункьини, биялсса агьалигу бавтIун, ГьунчIукьатIрал шяраву хьунни Буттал КIанттул цIанийсса дяъвилий гьуртту хьуминнан цIа кусса «Аьпалул аллея» тIитIлатIисса мажлис.

Муналгу, аьрай бивкIсса цинявнналвагу бунагьирттал аьпа баннав.
Дяъвилий гьуртту хьусса гьарцагу гьунчIукьатIиричунан цIа кусса мурхьру бугьан шагьрурдая бувкIун бия миннал аьпалул хьхьичI ник ришлашисса наслу, шяравучутал ва цайми-цаймигу бусравсса хъамал.
Му акциялул мажлис тIи­тIаврин хас дурсса митинг хьуна ГьунчIукьатIрал шяравун нани­сса ххуллуцIсса къурув.

Акциялий чялишну гьур­тту хьунни Лакрал райондалул бакIчи Юсуп МахIаммадов, цала кумагчитуращал ва райондалул идарарттал каялувчитуращал архIал. Мунал лавхъунни му кьинилуцIун ва райондалул багьу-бизулуцIун бавхIусса аьщуй-ххуттай авцIусса гьарза-гьартасса махъгу. Цала ихтилатраву Юсуплул кIицI лавгунни ГьунчIукьатIрал шярава чIявусса бувкшиву гьарца аралуву хьхьичIун ливчусса, райондалул ва щала Да­гъусттаннал цIа бюхттул дурсса ва дуллали­сса агьлу. Барчаллагь увкунни бу­ттал кIану буручлай бивкIминнал аьпа абад баврил ххуллийсса хха­ллилсса даврихлу, му бакIрайнгу лавсун, чулийн дуккан дурминнахь.
Митинграй мукунма махъру лавхъуна ДР-лул жяматий­сса ва политикийсса оьрмулуву цIа машгьурсса чув, бизнесмен Марат Илиясовлул, «Илчи» кказитрал хъунама редактор Руслан Башаевлул.


Мува мажлисрай «Бусравсса гьунчIукьатIиричу» тIисса цIа чирчусса ХIурматрал чагъарду буллунни Юсуп МахIаммадовлун, Сиражуттин Илиясовлун, Руслан Башаевлун ва Даниял Магьдиевлун.

Роза Къушиева
инжитну бунугу ветерантурал хIурматран бувкIуна мурхьру бугьлагьисса кIанттайн

Хъирив ГьунчIукьатIрал школалул дуклаки оьрчIал ккаккан дуруна му кьинилуцIун даркьусса назмурдал ва къавтIавурттал программа. Муния махъ, цинявппагу цачIун хьуну, паччахIххуллия байбивхьуну, шяравун бияннин­сса ххуллул тия ва шия бувгьуна 282 мурхь.