Ххяллулу ххюнкIлул кюруй

Ххирасса оьрчIрув!
Зул, оьрчIал, шеърирдаву мудангу дикIай шеърирдаву даркьусса аьчухшиву. Буккулт­рал дакIру таза дуккан дуллали­сса, шад дуллалисса.
ХIакьину «ЧIимучIалттул» хъаттирдай ришлай буру цIанихсса Гъумучиял школалул дуклаки оьрчIал назмурду, аьчухшиврул зума дурцIусса.

Умудрай буру лакку мазрал дарсру дихьлахьи­сса учительтурал хIарачатрайну жучIанма цайми-цайми школардал дук­лаки оьрчIал шеърирду ва хавардугу биянтIиссар тIий. Цумур школалийри утти яржа «ЧIимучIалттул» хъаттирдайн лахъан?
Ялугьланну, язисса ссайгъат­рах кунма, зул чагъардах.

«ЧIимучIали»


Ниттиха

Шаэрнал байссия
Ниттиха балай,
Ххуллийх най унува,
Щаращул чIарав.

ЧIивинува бура,
Бюхъай, хъун шайхту,
Ттуятугу буккан
Ца ххуйсса шаэр.

Яларив чичинна
На, ххира бавай,
Винни тIий цIа куну
Бюххансса махъру.

Уттирив, ттул бавай,
Ххирагу дурну,
Учинна вил чIаврайн
ДакIнихтуну ппай.

Сулайманова КьурбанпатIимат,
2-мур класс


УвкIра шавай, шанан ччай

КIи дуркIунни тти жучIан,
Дус увкIунни къатлучIан:
-Нану кьатIувай гьанну,
Чанардайгу бигьланну!

Лавгра ттула дуснащал
Зунттуйх чанардай бигьлан,
УвкIра шавай, шанан ччай
Агьра гъили пачлихун.

МахIаммадов Арслан,
4-мур «а» класс


Ниттиха

Лавхъун чанигу ниттил,
Изу, дадал ххирай, чай,
Гай нахIусса мукъурттил
Ттул дакI хъинну ххари дай.

ТIанкI куну, лавай ивзун,
Ххира дара на нину,
Ганил симан ттун лащай
ХъачIниха бувк бургъиха.

Ттул муаьллим

Ттун чичин лахьхьин бувсса,
ТIул-тIабиаьт кIул дурсса,
Ттущал ссавур хъун дурсса,
Ттул ххирасса муаьллим.

Вил захIмат ттун чIалай бур,
Му бур хъинну хъунмасса,
Вил захIмат дузрайн буккан
Нагу банна хIарачат.

Саидов Фарид, 4-мур «б» класс


Ттул ччиту

Ттул буссари ца ччиту
Аьжаивну урисса,
За дукан ччан бивкIукун,
Мяв тIий ттучIан бучIайсса.

На ччиту гьан бувара,
Кьурува кIулу бугьан,
КIуллуй язухъ шайссарив,
ТтучIанмай зана бикIай.

Тти на ччитун цибави?
КIулу бугьан къаччисса,
Нану, ччитуй, рутIинна
КIичIулувун оьлил накI.

Мутаев Ибрагьимхалил,
2-мур «б» класс


КIинтнил кIюрх

Та ВацIиллул хъачIниха
Гьарца кIюрххил баргъ буккай,
ЛяличIийсса рангирдай
Ттуруллив чIюлу дуллай.

Нагу, ччяни ивзуну,
Ва эмарат ккаккара,
Дунияллул ххуйшиву
Суратрайнгу ласара.

Аьбдулаьзиз ХIасанов,
2-мур класс


Я къабуччай ххуйшиврул!

Лагма бюхттул зунттурду,
Лултту хъяр-хъяртIи ратIру.
Миннул дянивх тIивтIун бур
Гъумучиял хъун шагьру.

Та ратIнил чулухуннай
Дуссар Уриннал ххуй щар!
Цуксса буругларчангу,
Я къабуччай ххуйшиврул!

ХIажидаудов ХIажи,
1-мур «б» класс


Ххяллулу ххюнкIлул кюруй

Ххяллулу ххюнкIлул кюруй,
Зунттал багъирдал улчай,
Инсаншиврул щаращий,
ТIаннул ЦIувкIуллал агьлуй!

Зунттаву мина дурсса
Буршигу жул дусталли,
ЧIарав бацIан хIадурсса
Ккулгу жул уссурвалли!

Ккацраннив хIав мурхьруксса
Душругу буссар ЦIувкIрав,
Ккавкманал ябацIансса
Жагьилталгу къачанссар!

Аьбдуллаева Айна,
1-мур «б» класс


ДакIмур мудан вичIан кIункIу тIун дикIай

Ттул ххирасса мина,
Ттул шяравалу
Дирхьуну дур лахъсса
Зунттал дяниву.

Лагмава зунттурду,
Арду, майданну.
Бявкъусса щаращив,
Хъунисса багъру.

Ххира шяравалу,
Гъази-Гъумучий,
Ттул аьзизсса кIануй,
Ттул буттал минай,
Цуксса нава вия архну бунугу,
ДакIмур мудан вичIан
кIункIу тIун дикIай.

Нажаева Саният,
1-мур «б» класс


Зунттуя бигьлан

Вана жучIаннагу
ДуркIун утти кIи,
КIяла марххалттащал,
Хъунма зунчащал.

Бачияра, оьрчIрув,
Гьаннуча ччеххуйн,
Чанардай щябивкIун,
Зунттуя бигьлан.

Ччеххуя хIаз лавсун,
ХIалгу бавкьуну,
Хьхьувай шаппай гьанну
ИшттахIну шанан.

КIюрххил лавай бивзун
Лажин-ка шюршун,
Ххуйсса гьавасращал
Гьанну дарсирайн.

Шахшаева Рабият


Хъунмямма – ттул хъун дусри

Ттул хъунасса дус уссар,
Оьрмулул кIяла увсса,
КIукъакIулсса бакъасса,
Хъунмямма тIий цIа дурксса!
КIулссар мямман назмугу,
ПасихIну бусай магьри,
БувчIай ччимур ссигъагу.
Хъунмямма – ттул хъун дусри!

Ябувара ниттихъул

Урвав дунияллий,
бусира, дустал,
Ниттияр гъансса дус,
даин дакIнийсса?
Буривав щилчIавгу
мукунсса аьмал,
Къаччан бикIарчангу,
кIул къабувайсса?

Буруччира, дустал,
жула нинухъру,
Ябувара миннул яруннаву пар.
ДакIру ххари дара
тIааьнсса мукъуй,
Жухава дуаьрттай
буссар ниттихъул.

ХIажидаудова ПатIимат,
4-мур «б» класс


Марххала

КIяла виргъан дуртунни
КIинтнил лухччинул ялтту.
ЧIюлу хьунни мурхьругу,
Памма ялтту бивчуну.

Гуржай букланну утти,
Лечлай марххалттанийхгу.
ЦIусса марххалттания
Ххари хьунни оьрчIругу.

Аюбов Сулайман


«ЧIимучIали хIадур бувссар
П. Рамазановал