Кказитрал хьхьичIми номердай жу бувсъссия дунияллул халкьуннал дянивсса миллатрал культуралул ва искусствалул World FOLK Vision фестиваль-конкурсрая.Финалданий гьуртту хьунми язи бугьлагьисса ятIап хьуссия Сочи шагьрулий. Ва ятIапрай, яла язимур, яла яргмур ансамбль хIисаврай, Гран-при ларсъсса Лаващиял райондалиясса «Авадан» ансамбльгу дагьссия финалданувун.
Андриана Аьбдуллаева
Март зурул 9-нния 19-ннийн бияннин фестиваль-конкурсрал финал най дуссия Саоьдуллал Аьрабусттаннай, Эр-Рияд шагьрулий.
Дагъусттаннал ансамбльданущал тихун лавгссия World FOLK Vision фестивальданул Ухссавнил Ккавкказуллал федерал округрайсса национал директор Разита Мушидова.
90 билаятраясса 3000 инсан гьуртту хьусса фестиваль-конкурсрай Дагъусттаннал ансамбльданул ларсунни Гран-при. Гьарцагу шикку гьуртту хьусса коллективрал хъунмасса хIарачат бунни цала-цала гьунарду, миллатрал культуралул аваданшиву ва ляличIишиву ккаккан дан. «Авадан» ансамбльданул фестивальданий ккаккан дурсса яргсса, гьавас-шавкь рутлатисса национал къавтIавурттал ва пагьламантурал хьхьуттай бувсса гьунардал махIаттал бунни щалагу дунияллиясса тамашачитал. Жюрилулгу вайннан лайкьсса кьимат бивщунни.
Соцсетирдаву та конкурсраясса видеортту ххал дуллай, Аьрасат, Дагъусттан куну баян бувну, сахIналийн жулами буккайхту, пахрулул дурцIунни дакI. Иш ца Гран-при ласаврийну къуртал къавхьуссар. Ансамбльданул коллектив Разитал хIарачатрайну тIайла бувкссар Маккалив.
Ларгсса нюжмар кьини АхIмад-хан Султаннул цIанийсса аэропортрайн Ххувшаврищал зана хьусса «Авадан» ансамбльданул коллектив ва фестивальданул цинярдагу ятIапирттай вайннащал архIал бивкIсса Разита Мушидова лахъа-хъунну хьунабакьин тIутIал кацIурдищал ва бахшиширттащал бувкIун бия Лаващиял райондалул бакIчи Шамил Дабишев, ванал цалчинма заместитель Аьвдусалам Дибиров, Шапи Ахъушали, Дагъусттаннал бизнес-клубрал ва республикалул СМИ-дал вакилтал, кьатIату зана хьуминнал дустал ва гъан-маччами.
