2015-ку шинал, 30 шинайсса бацIавугу дурну, Б. Щукиннул цIанийсса Театрал институтраву щаллу бувну бур Дагъусттаннал студия – 12 дагъусттанлувная хьуну бур цIанихсса институтрал студентътал,миннаватугу 10-ннал му ххуллу щалва бивтун бур. Хасну ми ацIагу выпускникнащал хьунабавкьунни вай гьантрай тамашачитал Къумукьнал театрданул сахIналий.
Бадрижамал Аьлиева
[dropcap]Б[/dropcap]илаятрал хъуншагьрулий, ца яла сий думур институтраву дуккавугу дурну, дипломрал спектальлащал бувкIунни жагьилсса артистътал.
Театрал десант буттал аьрщарай хьунабакьлай, ихтилат бувна ДР-лул культуралул министр Зарема Буттаевал. Цилва ихтилатраву министрнал чIурчIав дуруна ва хъинну хъунмасса ва ххарисса иш хъанахъишиву.
[dropcap]К[/dropcap]IицI лавгуна ялун бувкIсса жагьилсса актертал хъанахъишиву цIусса, яргсса сменану, цувгу хьун аьркинсса республикалул театрдал пахруну. Ахирданий министрнал барчаллагь увкуна ва даву цIулаган давриву кабакьу бувсса режиссер Скандарбек Тулпаровлухь, вай жагьилтал ккалай бивкIсса курсирал художествалул каялувчи Михаил Семаковлухь, буллуна мунан министерствалул чулухасса Барчаллагьрал чагъаргу. Ихтилат бувна Къумукьнал театрданул директор Айгум Айгумовлулгу.
Цалва асарду ва пикрирду тамашачитуращал кIибавчIунни Михаил Семаковлулгу.
— ХIакьинусса кьинилучIан най жул хъунмасса хIал хьунни. Вай мукьрагу шинал дянив зу ттун тIивтIунни Дагъусттан, тIивтIунни мунил ххаллилсса инсантал, бахшиш дунни ттун миннащалсса хIала-гьурттушивриясса ххаришиву.
Ва кьини выпускниктурал ккаккан бунни Бернард Шоул «Миллионерша» спектакль.
