[dropcap]А[/dropcap]прельданул 15-нний ДР-лул Спортрал министерствалийн увкIунни жулла республикалул лачIун буккаврил федерациялул каялувчи Сажид Сажидов.
ХIасан Аьдилов
Вай гьантрай Руминиянал хъуншагьру Бухарестлив хьусса лачIун буккаврил Европанал чемпионатрал хIасиллан кьимат бишлай, Сажид Сажидовлул бувсунни Аьрасатнал цачIундур команда хьхьарану дурккун диркIшиву. Гьашинусса Европанал чемпионатрай Аьрасатнал лачIунбуккултрал дурххунни 2 мусил, 2 арцул ва 4 чарвитул медаль.
Цинярда медальлу хIисавравун ларсун жула билаятрал командалул бувгьуссар 1-мур кIану. «ДукIумур чемпионатрай ларсъсса 6 мусил медальданух бурувгун, гьашинуми 2 мусил медаль – ххуй-хъинсса хIасилли чин къахьунссар, му хьхьарасса ккаккияр, Аьрасатнал лачIунбуккаврил федерациялул каялувчинал цамур кьимат бишлайнугу», — увкунни Сажидовлул.
МунацIун авкьунни ДР-лул спортрал министр МахIаммад МахIаммадовгу. Мунал тIимунийну, ларсъсса наградарттахгу къабурувгун, учин бюхълай бур, Дагъусттаннал лачIунбуккултраща бюхъанссия цахъисгу хьхьичIунну буккан.
Шиккува бусан, мусил медальлу Европанал чемпионатрай ларсунни Аьрасатнал командалул капитан Аьвдурашид Сяъдуллаевлул ва Владислав Валиевлул.
