Хасавюртливсса иш-тагьар

Апрельданул 3-нний ДР-лул БакIчи Владимир Васильевлул ва Аьрасатнал «Роспотребнадзорданул» хъунмур Анна Поповал дунни Хасавюртлив ххюттуканил азар сукку шаврил хIакъиравусса батIаву.

Азар сукку шаврил савав шагьрулийн чапалсса щин най душавур кунни батIаврий. ЦIанасса ппурттуву гикку дуллай бур эпидемиялийн къаршисса давуртту. Шагьрулул агьали марцIсса щинал дузал буллай бур ва эпидемиялул кюртти бивкIсса кIанттурдай профилактикалул давуртту дуллай бур. ЦIана Хасавюртлив ххюттуканил азардал къашавай­сса чан хъанай бур.

Владимир Васильевлул бувсунни республикалул каялувчитурал хъуннасса къулагъас дуллай бушиву агьали марцIсса щинал дузал баврих. «Бюджет­равунсса налогру гьарза даврийну жуща бювхъунни гьашину агьали марцIсса щинал щаллу баврил давурттан итадакьин 1,7 млрд. къуруш. Микссара арцу дучIантIиссар мира давурттан федерал бюджетраватугу» увкунни мунал.

Анна Поповал хъин чулийсса кьимат бивщунни республикалий ххюттуканил азарду сукку шаврил хьхьичIалу кьукьин дурсса давурттан. Мунил тIимунийну, цила чIумал бювхъунни, цинярда аьркинсса давуртту дурну, чапалсса щин агьалиначIан нанаву дацIан дуван, къашавай хьуминнан медициналул кумаг буван.
Анна Поповал тасттикь бунни ххюттуканил лахъай азар су­кку шаврил савав чапалсса щин хъанахъишиву, му исват бувссар щинал анализ дурну махъ.
Аьрасатнал Роспотребнадзорданул хъунмунил бувсунни ттинияр тихуннайгу дуллан аьркинсса давурттал хIакъираву.