Цукун буру? Ци иш бур. Мадара хIал хьунуккар на зухь жула группалувусса цIусса хаварду къабувсун. Хавардурив бур ххарисса. Ххаришивугу дур гьунар бусса жула лакку оьрчIая, учиннуча жула группалул «аьмсса» оьрчIая. КIидачIинну зущалгу жула ххаришиву.

Ххув хьунни лакку оьрчI

ХьхьичIва-хьхьичI ттун бусан ччива уттигъанну, Аьраб­нал Эмиратирттал хъуншагьрулий Дубайлив хьусса джиу-джитсулул дунияллул чемпионатрай ххув хьуну, чемпионнал цIа ларсшиву Буйнакскаллал 7-мур школалий дуклакисса жула лакку оьрчIал, ЧIяйннал шяравасса Ринатлул ва Аьйшатлул арс Тимур Расуловлул.
Ва «Лакку билаятрал рухI» группалувусса Хамисатлул, Зулайхатлул, ПатIиматлул, Дездемонал гъанчури. Жу щала группа вайннахь ххаришиву кIидачIлай бивкIру.
Джиу-джитсулул турнир Дубай шагьрулий гьашину арилчинни хьусса. Ва дия ва журалул спортрал дунияллий яла хъуннамур турнир. Шикку гьуртту хьунни 100-нния ливчусса билаятирттаясса 7 азара спортсмен.

Бяст-ччаллу хьунни, мюрщи жагьилтурая байбивхьу­ну, оьрмулул хъуниминнайн бияннинсса, хъаннилгу, чиваркIунналгу дянив, мукунма цIуллу-сагъшиврул ссуссукьуминнал дянив.
Турнирданул призирттал фонд дур 500 азарва доллар. Вай бяст-ччаллах хъуннасса къулагъас дуллай ур цува Аьрабнал Эмиратирттал паччахI (принц) МухIаммад бин Зайеда.
Шама муттаэнащал увккун, шанмагу бяст-ччалливу ххув хьуну, цала кIушиву дусса спортсментураву чемпион хьунни 10 шинавусса Тимур Расулов. ЧIивисса оьрмулий Тимурдул уттинин цикссагу ххувшавур­тту ларсун дур Дагъусттаннал, Ух­ссавнил Ккавкказуллал федерал округрал, Аьрасатнал ва Европанал первенствардай, цимирагу дунияллул халкьуннал дянивсса турнирдай ларсун дур чемпионнал пояс. Тимурдул тренер Ибрагьин Ибрагьимовлул ва спортрал пишакартурал бусласимунийн бувну, ва ляличIисса гьунарданул заллу ур, щак ба­къар ваная бюхттулсса даражалул спортсмен хьуншиврийн, ванал цIа жунна уттиния тихуннайгу чIяруну балланшиврийн.

Ххув хьунни лакку душ

Ца ххаришиву дикIайхха жула оьрчIая хьхьичIунсса, цалчинсса, гьунар бусса тIий буслан. Хъунма хIал къавхьунни Москавуллал школалий дуклаки оьрчIал дянивсса ттуплий бу­ккаврил бяст-ччал хьуну. Ва дия цинявппагу Москавуллал школарттал дуклаки оьрчIру гьуртту хьусса Совет Союзрал Виричу Надежда Трояннул завалунсса III-мур спартакиада. Ва бяст-ччалливу 2004-2006 шинал бувсса душвараву цалчин­сса кIану бувгьунни Москавлив ялапар хъанахъисса жула лакку душ, КIундиннал шяраватусса Исял ва Аьйшатлул душ Хъунбуттаева Маликатлул.
Маликатлул нину Аьйшатгу ва жула группалувассар.

Шиккува бусан, лахъива-лахъисса, караматсса хIаллурду бусса Маликатлул, ваниннин хьхьичI школалий баян бувсса «Варвара краса – длинная коса» конкурсрайгу гьуртту хьуну, кIилчинмур кIану бувгьуссия. Маликат дуклай бур Москавуллал 1164-мур школалий 7-мур классраву. Дуклай бур марцIну ххювардай. Гьарца шинах ванил, оьрус мазрал ва литературалул олимпиадарттай гьуртту хьуну, грамотартту ва бахшишру ласлай бур. Москавуллал школалий жула лакку душ укун хьхьичIунну бушиву хъунмасса ишри. Барчаллагьри Маликатлунгу, ванил нитти-буттангу, билаятрал хъуншагьрулий лакрал цIа гьаз дуллай тIий.

Жула оьрчI «Поле чудесрай» гьуртту хьунтIиссар

Дустал, на хьхьичIрагу кIицI дурссия личIи-личIисса конкурсирттай ва фестиваллай гьуртту шайсса жула лакку оьрчI Мурад Хушлаевлул цIа. Икьрал дуссар мунащал хьунабакьин. На ва оьрчIая зухь гьарта-гьарзану бусанна цахъи махъ. Цалссарив, зу ххал даншиврул, бусан ччай бур ва гьуртту хьунтIишиву «Поле чудес» капитал-шоулий. Ва передача дикIантIиссар май зурул 31-нний. Ххал увара жула оьрчI.
Передачалий гьуртту хьуну махъ Мурад учIантIиссар жучIан редакциялийн. Ва хьунабакьавриягу на зухь бусанна.
Мурадлуннив чIа тIий буру «Поле чудесрая» ххувшаврищал ва бахшиширттащал зана шаву!

Андриана Аьбдуллаева