Даврил иширай Москавлив лавгсса Дагъусттаннал хъунама Владимир Васильев хьунаавкьунни Москавуллал ва щалвагу Аьрасайнал Патриарх Кириллущал.Ва хьунабакьаврий гьаз бунни МахIачкъалалив мубараксса князь Александр Невскийл собор буваврил масъалагу.
П. Рамазанова
1871 шинала дяшагьрулуву бувсса храм 1953 шинал пIякь учин бувну бур, му бивкIсса кIанайгу Дагъусттаннал хIукуматрал къатри дурну дур. 2015 шинал храм цIу буккан баврил масъала гьаз бувссия, Ак-Гель бярнил чIарав ккаккан бувссия му бувансса кIанугу. Амма, шагьрулул активистал паркраву храм къабувантIиссар тIий кьянкьану бавцIуну, храм бувансса кIанттул кьутIи къадурнура лирчIун дур.
Васильевлул бувсунни, архитектортурайн, экспертътурайн ва цаймигу пишакартурайн бувккун, маслихIатрай бавкьуну, храм бувансса кIанттул бази бувантIишиву. Бувсунни Ак-Гель бярничIансса ххуллугу лакьин дакIний бакъашиву, паркрангу собордания цукунчIавсса зарал къабиянтIишиву. Хьунабакьаврий ххал бивгьунни диндалуцIун бавхIусса цаймигу масъалартту.
