«ЕГЭ дуллунугу, къадуллунугу, оьрму наниссар, ласласияра муниясса ххаришиву»

Каспийскалий ГГИМХО-луву хьунни Щалагу Аьрасатнал «Сто баллов для победы» тIисса цIанилусса акция. Му сакин дурну дия ДР-лул КIулшиву дулаврил ва элмулул министерствалул.

Акциялул мяъна-мурад бия 100 баллданун ЕГЭ дуллусса выпускниктурал му экзамен дулун наниминнащал опыт кIибачIаву, миннансса маслихIатру-насихIатру баву.
Ва иширавух гьуртту хьуна шагьрулул администрациялул бакIчинал хъиривчу Людмила Левицкая, ГГИМХО-лул директор Людмила Оьмарова, ДР-лул Хъаннил союзрал председатель Интизар Мамутаева, Информация лази-лакьи бувайсса Республикалул центрданул каялувчи Аскандар МахIаммадов, ДГУ-лул оьруснал литературалул кафедралул доцент Муса ХIажиев, ДР-лул Жяматийсса Палаталул член Сергей Никитин, Поэзиялул театрданул директор Елена Гьарунова, мукунма шагьрулул школарттал 11-ми кла­ссирттал дуклаки оьрчIру.

Хьунабакьаву дайдихьлай, ДР-лул КIулшиву дулаврил ва элмулул министерствалул пишакар Лайла Асланбековал бувсунни ва акция Аьрасатнаву ххюйлчин дуллалишиву, ванивух билаятрал цинярдагу регионну гьуртту шайшиву.
Ларгсса шинал жулла республикалий 100 баллайну ЕГЭ дуллуну дур 19 выпускникнал.
Ва кьини хьуна чIявусса ихтилатру, оьрчIал оьрмулуву ЕГЭ-лул бугьлагьисса кIанттуя, мунил лагмасса авазалия. Ихтилатчитуравасса цаннал, Муса ХIажиевлул, увкуна:

— Ттул пикрилий, оьрчIрув, зу ЕГЭ дулаврил ягу къадулаврил хъуннасса агьамшиву дакъа­ссар, ЕГЭ – му дур дикIаннагу ца шартI, ца каши, му дакъахьурча, зул хьхьичI зула мурадрайн биян­сса цаймигу ххуллурду буссар. Зу му дуллунугу, къадуллунугу, оьрму наниссар. Оьрмулия ххари хъанансса чIунгу зу институт бувккуну махъ, 5 шинавун, къадучIантIиссарча, цIанава, шиккувар ххари хъанан аьркинсса, гьарцагу шаттирахун, гьарцагу лахIзалухун ласлан аьркинссар оьрмулиясса тIин-тIааьн.

ЕГЭ хьхьичIунну дуллусса оьрчIал бунни ялуннин му экзамен дулун нанисса оьрчIансса маслихIатругу.

Бадрижамал Аьлиевал