Луттирдал дунияллий

НурмахIаммад ХIасниев

Уттисса заманнай телевизорданул ва интернетрал хъунма­сса кIану бугьлай бухьурчагу, луттирдал сий тачIаврагу духкъахьунтIиссар.Уттигъанну, Хъювхъиял шяравун аьрххилий лавгун унува, на увхссияв ттула дус ХIасниев НурмахIаммадлул каялувшиву дуллалисса библиотекалийн.


Лазилавкьуну бивхьусса лу­ттирдал я ххари буллай бия. НурмахIаммадлул бувсуна ттухь Хъювхъиял шяраву яхъанахъи­сса 360-нния ливчусса инсантурава цачIанма луттирдал хъирив бучIайшиву 120-нния ливчусса буккулт. Вай хъанай бур шанма бутIул ца бутIа.

Ялагу НурмахIаммадлул бувсуна ттухь библиотекалий бушиву 8382 лу. Вайннува 1021 лу бур тIива лакку мазрайсса. Машаллагь!
НурмахIаммад цала буттал шяраву зий икIайссия личIи-личIисса давурттай. Дурссар ванал шяраваллил бакIчинал давугу. Утти бусанна НурмахIаммад ттула дусгу цукун хьуссарив.
Цаппара шиннардил хьхьичI (га чIумал НурмахIаммад Хъювхъиял шяраваллил бакIчину ­уссия) на Лаккуяту ца гъансса инсаннал чIиви машиналий шагьрулийн най уссияв. Дурусну Хъювхъиял ва Къяннал чулийнмай кIура баяйсса Гъумучату нанисса ххуллул шанбачIулийн бияйхту, на нанисса машиналул махъсса нигьирттал балка гъаргъун, жул машина щябивкIуна. Хъирив хьуну лавгссияв на ттула НурмахIаммадлучIан. Ттул бахттилун, бакIрайн агьуна ккурчIав цайми арамтуращал.

Бувсъссия нава авара хьушиву. НурмахIаммадлул, чан-кьансса хъярчругу бувну: «Жува лак­рал журналист ххуллий кьа­къаитайссар», — куну, жул машиналул гъаргъсса балкагу дур­ккун, цамур сагъсса балка дишин дуруна Сергей тIисса жагьилнахь. Лакрал райондалийсса ца шярава учIан увна экьиларгсса хьюмушиву ттурмузирттавун рутIинсса инсангу. Укунсса иширттайн бувну учайхьунссар: «На ина бувмур, лахъан къахьурчагу, хъамакъабитанна», — куну.
ХIакьину Хъювхъиял шяраваллил бакIчину зий ур та «механик» – Сергей Кьурбанов. Чумартсса чиваркI зунттал шяраваллаву муданмагу чан бакъа­ссар. Миннавасса кIиннал цIа на зухь кIицI дував.