МахIачкъалалив хьунни щалагу Аьрасатнал хорданул фестивальданул региондалулмур этап. Муний гьурттушинна дурунни республикалул шагьрурдаясса ва районнаясса 20 коллективрал.
* * *
Республикалул Халкьуннал творчествалул къатлул сакин дурну, генерал-полковник Г. Трошиннул цIанийсса Дагъусттаннал кадетътурал корпусраву хьунни Дагъусттаннал халкьуннал канил пишардал мастер-классру. Микку оьрчIан кIул хьунни Ахъушиял райондалийсса Бархъаллал шяраваллил цIа дурккун душиву усттарсса тIахIунтту даврийну, мукунна республикалул цайми-цайми щархъал канил пишардая.
* * *
МахIачкъалалив Поэзиялул театрдануву тIиртIунни культуралул ва выставкалул проект – «Арт-Перекресток: Верхневолжье-Дагестан» тIисса цIанилусса. Проект тIитIлатIисса шадлугърай гьуртту хьунни ДР-лул ХIукуматрал цалчинма хъиривчу Анатолий Карибов, ДР-лул культуралул министр Зарема Буттаева, туризмалул ва халкьуннал художествалул пишардал министр Расул Ибрагьимов ва цаймигу бусравсса хъамал.
* * *
Дарбантлив, Нарин-Къалалий, тIиртIунни Москавуллал художниктурал эбрулул (щинай накьич дишаврил) техникалул ва аьрабнал каллиграфиялул давурттал выставка, «Облака, гонимые ветром» цIанилусса. Вай дур уттизаманнул художниктурал дирхьусса суратру.
* * *
Апрельданул 20-нний жулла республикалулгу гьурттушинна дувантIиссар «Библионочь-2019» акциялий. Акциялул гьашинумур тема дур «Весь мир – театр» тIисса. Национал библиотекалул цинявппагу майданнай, ахттакьун ссят 18-нния байбивхьуну, хьхьудяризаннин, хьунтIиссар личIи-личIисса шадлугъру.
* * *
Дарбантуллул музей-заповедникрал, музейрал гьану бивзун 30 шин шаврин хасну, дуллай бур аьрххилул выставкартту. Ва ххуллухсса выставка хьунтIиссар Татарсттан Республикалул Елабуги шагьрулул паччахIлугърал музей-заповедникраву. Муниннин «Дербент легендарный, Дербент исторический» цIанилусса ва выставка диркIссар Кострома шагьрулул музей-заповедникраву.
* * *
Майрал 16-17-нний Нальчик шагьрулий, Ухссавнил Ккавкказуллал паччахIлугърал искусствардал институтраву, хьунтIиссар Ухссавнил Ккавкказуллал жагьилтурал кинофестиваль «Кинокавказ – 2019». Муний гьуртту хьун оьвтIий бур пишакарсса ва зий дахьва байбихьлахьисса, оьрмулул 16 шинава 35 шинавун бияннинсса кинематографистътурайн.
ХIадур бувссар
Бадрижамал Аьлиевал
