Кисловрайсса тарихрал ва улча лахьхьаврил музейраву тIивтIунни «Оьргърал чIюй-къала» тIисса печатьрал графикалул выставка.
П. Рамазанова
Микку машгьурсса художниктуращал, гравюралул цIанихсса усттартуращал архIал гьуртту хьунни Москавлиясса, Петербурграясса ва цаймигу шагьрурдаясса жагьилсса художникталгу. Цаппара художниктурал, ва выставкалий гьуртту хьуннин, этюдру дуллай, зий, ацIва гьантта бувну бур Оьргърал шяраву.
Кисловрал художниктурал идаралул хъунама Владимир Сиповичлул кIицI лавгунни гравюралул даву личIиссара магьиршиву, заргалнал кунмасса бюхъу аьркинсса даву душиву. Выставкалий ихтилатру бунни музейрал директор Сергей Лузиннул, Чаргаснавусса Ухссавнил Ккавкказуллал паччахIлугърал академиялул дизайнрал факультетрал декан Лариса Атаевал.
Ванил буллунни ва проектрал сиптачитуран «Дизайнертурал союз» тIисса Дунияллул халкьуннал дянивсса ассоциациялул чулухасса дипломругу. Ухссавнил Ккавкказуллал цаппара шагьрурдай выставкарду дурну махъ Кисловрал музейравусса ми цинярдагу суратру Оьргърал музейравун дулунтIий бур. Укунсса журалул выставка цурдагу кIира шинай цал дуллансса ният дур ванил сиптачитуран.
