Каспийск шагьрулул тарихрацIун хъинну чIявусса лакрал цIарду дархIуну дур. Дагъусттаннал промышленностьрал центрданун ккаллисса му шагьрулул тарихраллажинтирттайсса цIардаву ца яргмунин ккаллину дур ГьунчIукьатIрал шяравасса Аьбидлул арс Жанаев Рамизлул цIагу. Мунал 110 шин хъанахъаврицIунгу бавхIуну, Рамиз дакIнийн утлатисса ихтилат хьунни мунал душнил, чIярусса шиннардий ВОС-рал (Всероссийское общество слепых) Каспийскаллал отделениялул хъунмурну зий бивкIсса Каримова Елена-Ххадижатлул ва жул дянив.
Бадрижамал Аьлиева
Увну ур Рамиз 1909 шинал ГьунчIукьатIрал шяравасса Аьбидлул ва Савдатлул кулпатраву. Революция хьуннин Аьбид ялапар хъанай ивкIун ур Бухарнаву, заргалнал пишалий зугу-зий. Революциялия махъ Дагъусттаннайн ачин багьну бур, бигьа дакъасса чIумул сававрттайн бувнугу, УзбакIнал ССР-данул цалчинсса нарком, революциялул давривусса цала уртакь ва цIакьсса дус, Пайзулла Ходжаевлул насихIатрайн бувну. Ххуллийх моляриялул къашавай хьуну, буттал шяравун увкIун хъунма хIал къавхьуну, Аьбид ивкIуну ур. Муниннин цала кулпатрахь Савдатлухь увкуну бур, цанма хъунма хIал къаливчIшиву бувчIуну, оьрчIругу бувцуну, махъунмай Бухарнавун насу куну. Ласгу увччуну, Рамиз ва Каримгу бувцуну, Савдат зана хьуну бур УзбакIнавунмай, ласнал увкумур щаллу буван. Амма, тихун бувкIун махъ къашавай хьуну, лахъи къалавгун, жагьилсса оьрмулий бивкIуну бур нитти-буттал ца бакъа-бакъу, бакIралгу-чурххалгу бювхъусса Савдат. Рамиз ва Карин мюрщисса оьрмурдай ятинталну ливчIун бур. Мукун, Рамизлул буттал, Аьбидлул, гьав хьуну дур ГьунчIукьатIув, ниттилсса – архсса УзбакIнаву. Ччяни оьрмулува лавгсса цала дуснал оьрчIан шайсса ка-кумаг бувну бур Пайзулла Ходжаевлул. Рамизлул бувккуну бур Бухараллал учительтурал институт, мукуна дуклай ивкIун ур УзбакIнал рабфакрай, аэрогидродинамикалул факультетрайгу. Ахиргу Дагъусттаннайн зана хьуну ур Рамиз. Шикку ванаща бювхъуну бур Двигательстрой поселокрай зунсса цала буттал шяравасса ва лакрал цаймигу щархъавасса лайкьсса инсантурая сакин хьусса команда датIин.
1932-ку шинал заводрал стройкалул каялувчину ивтун ур Н.А. Фетисов. ВКП-лул Дагъобкомрал хIукмулийн бувну, стройкалий сакин дурну дур 90-нния ливчусса коммунистътал бусса партиялул организация, мунил бакIчинугу ивтун ур цIа дурксса гьунчIукьатIиричу Загьиди Феодаев.
КIирисса бургъилу, бацIаву, буххаву цирив къакIулну зий бивкIун бур вай шагьру ва завод буллай. Рамиз кунмасса каялувчитурал, зузалтрал хIарачатрайну, авлахърай заводрал цалчинсса фундамент бувну бур 1932-ку шинал гъинттул. Му иширан хасну дурну диркIун дур митинг. Ца бюрналул лув бивхьуну бур ялун дучIантIисса никирттайнсса оьвчаву дусса чIутIул къурши. Стройкалул парторг Загьиди Феодаевлул тIурча, цамур бюрналул лув цалла арцул портсигар дирхьуну дур.
Гихунай Рамиз зий ивкIун ур личIи-личIисса къуллугъирттай: постройкомрал председательну, хъунама технологнал отделдануву техникалул даву ларай даврил бюрорал начальникну, захIматрал инспекторну, райпрофсоветрал жаваблувсса секретарьну. Рамиз цимилгу гьуртту хьуну ур халкьуннал хозяйствалул выставкарттай. Ва цимилгу лайкь хьуну ур наградарттан.
— Ппу икIайва ххишала акъа интеллигентнайсса, дакIнил хъинсса, гьарцагу инсаннах хъунмасса хIурматрай, инсаншиврий уругайсса. Бухаралий мадрасалуву ккалай ивкIун, буттан ххуйну кIула аьраб маз, дакIних кIула Кьуран. КIула цайми мазругу, бувккуну бия дазу-зума дакъасса луттирду, жугу, цалва мукьвагу оьрчI, ккалакки буллай икIайва луттирду. Буттал хIарачатрайн бувну, чIивиний магьри ккалай, хъунма хьувкун, цайми луттирду ккалай, навагу хъинну чIявусса луттирду бувккуссар. Ппу икIайва гьарца чулухасса кIулшивуртту дусса, мазралгу хъинну пасихIсса. Загьиди Феодаевлущал архIал буттал Каспийскалийн, «Дагдизель» заводрайн чIявусса лак кIункIу бувссар, нахIакь дан бакъар хьхьичIва Каспийскалийн лакрал шагьру учайсса бивкIсса, — тIий буслай бур Елена-Ххадижат.
ХIурхIа буван къашай чIумул ша. Лавгунни ва лаглай бур яхIлувсса ярг-яргсса инсантал. Амма уттавассар миннал кьабивтсса аманат, аьпа.
