Апрельданул 11-нний МахIачкъалаллал Дусшиврул къатлуву хьунни ДР-лул БакIчи Владимир Васильев ва дуккаврил ва элмулул аралуву надзорданул федерал къуллугърал каялувчи Сергей Кравцов гьурттусса 2019 шинал ЕГЭ-лийн хIадур шаврил хIакъиравусса батIаву.Муний гьуртту хьунни Рособрнадзорданул вакилтал, дуккаврил идарарттал каялувчитал, муниципал сакиншиннардал бакIчитал.
В. Васильевлул тIимунийну, махъсса шиннардий Дагъусттаннай ЕГЭ дулаврил тагьар ххуй хъанай дур, давурттал дянивсса балл лахъ хъанай бур, лавайсса баллу ласайми гьарза хъанай бур, миннавух 100 балл лавсмигу. 2018 шинал сайки кIилий чан хьунни аттестат къалавсун ливчIсса школа къуртал бувми, амма региондалий му масъала уттигу дузал хьуссаннун ккаллину бакъар. Ларгсса шинал ЕГЭ дулаврил хIасиллу лахъ хьунни дянивну лавсун 4,5 баллданул цинярда дарсирдай. 232 дуклаки оьрчIал ххи хьунни 80 ва миннаяр чIявусса баллу лавсми, 19 абитуриентнал лавсунни гьарнал 100 балл, миннавасса цаннал 2 дарсирай лавсунни гьарцанний 100 балл. «Му жула пахрур», — увкунни В. Васильевлул.
Сергей Кравцовлул тIимунийну, хъинну дурккусса оьрчIру бакъахьурча, республикалийгу, билаятрайгу, экономикалувугу хьхьичIуннайшиву къахьунтIиссар. Мунияту хIакьину республикалий дуллалимур – ми чIярусса шиннардийн хасну дуллалисса давурттур. Шикку ихтилат так ца экзаменну дулаврия бакъарча, ихтилат мукунма цIусса школартту бавриятур, учительтуращалсса давурттаятугур, школартту луттирдал дузал бавриягур. Мунил цIанийру жува хIакьину зузисса.
Мунал бувсунни мукунма нитти-буттащалгу зун аьркиншиву, ми паракьатну бикIаншиврул экзаменну дулаврил иширттая. Миннан бувчIин буван аьркинссар экзаменнай личIисса дахханашивуртту къадикIантIишиву, 11 шинай школалий лавхьхьумурди экзаменнай бикIантIисса. Аттестат ласуншиврул аьркинссар математикалул ва оьрус мазрал дарсирай 24 балл ласун.
Дагъусттаннай хьхьичIми шиннардий ЕГЭ дулаврил хIасиллая ва гьашину экзаменну дулаврил иширттая гьартану бувсунни Сергей Кравцовлул хъиривчу Игорь Круглинскийл.
Гьашину ЕГЭ дулаврил хIакъираву бувсунни ДР-лул дуккаврил ва элмулул министр Уммупазил Оьмаровал.
ХIадур бувссар ХI. Аьдиловлул
