Аьрасатнал КIулшиву дулаврил министерствалул баян бунни билаятрал школарттай, Космонавтикалул кьинилун хасну, Гагариннул дарсру дикIантIишивува чара бакъа циняв регионнайсса школарттугу гьуртту хьун аьркиншиву.
ХьхьичIра-хьхьичI Гагариннул дарсру дирхьуссия 2016 шинал апрель зурул 12-нний, Юрий Гагарин космосравун левххун 55 шин шаврин хас дурну. Хъиривмур шинал Гагариннул дарсру дирхьуссар 97 билаятрай. Гьашинумур дарс, «Аьлам – му жувару» тIисса, хас дувантIий бур Гагариннун цанна 85 шин хьунтIий диркIшиврунгу, Алексей Леонов хIаласса летчик-космонавтътурал юбилейрдангу.
Ва дарс дишин кумагрансса материаллу Москавливсса Космонавтикалул музейрал, хIадургу дурну, цалла официал сайтрай дирхьуну дур : www.kosmo-museum.ru . Вара сайтрай дикIантIиссар Роскосмосрал космонавтътурал МКС-лиясса видеообращениягу. Вайра дарсирдал лагрулий апрель зурул 12-нний «Виричунал парта» тIисса акциягу хьунтIиссар, жучIава Аьрасатнаву ва кьатIаллил билаятирттай дишинтIиссар 11 хIурматрайсса партарду, Космосрал вирттаврал партарду.
Дагъусттаннал школардайгу дишинтIиссар Гагариннул дарсру. Чялишну хIала буххияра ва давривух, зулла дарсру лайкьсса даражалийсса хьуншиврул ххал дувара Москавуллал космонавтикалул музейрал сайтрайсса материаллугу. Жугу умудрай буру лакрал школарттай Космонавтикалул дарсру дирхьуминнал муниясса информациягу, суратругу жучIан редакциялийнгу тIайла дукканссар тIий. Ялугьланну.
ХIадур бувссар
П. Рамазановал
