Апрельданул 19-нний МахIачкъалалив Национал библиотекалул къатраву хьунни Аьрасатнал Мюхчаншиврул Советрал секретарь Николай Патрушевлул СКФО-лийсса батIаву.
Муний гьуртту хьунни Аьрасатнал Президентнал СКФО-лийсса вакил Александр Матовников, ДР-лул БакIчи Владимир Васильев, Республикалул ХIукуматрал члентал, регионнал бакIчитал ва цаймигу. Ххал бивгьунни 2 масъала – округрайсса жяматийсса ва политикалул тагьар, энергетикалул мюхчаншиву.
Николай Патрушевлул, махъ лахълай, бувсунни уттинин дурсса давурттал хIасиллая. Мунал тIимунийну, увгьуну ур террорданул ва экстремизмалул иширттавух хIала-гьурттусса 452 инсан. Округрай хасъсса операцияртту бувну, ивкIуссар 64 боевик, увгьуну, судрахьхьун уллуссар бандитътурал сакиншиннардавух хIала-гьуртту хьусса 285 инсан. Террористурал 37 кюру лавкьуссар. Ашкара бувссар жяматийсса тагьар лиян дуллалисса радикал исламрал идеологтал, миннавасса 44 жавабрайн кIункIу увссар. Закондалий бакъа СКФО-лул аьрщарайн бучIан хIарачатрайсса 1600 инсаннал хьхьичIалу кьуркьуссар. Жула билаятрая буккан бувссар сайки 3500 чил билаятирттал инсантал. Ми цинярда дурсса давурттал хIасиллуну хьуссар округрай экстремистшиврул ва террористшиврул ишру чан шаву, ярагъ ва пIякь учайсса затру машай дуккан дуллалисса ишру чан шаву ва цаймигу закон лиян дуллалисса ишру.
Муния махъ ххал бивгьунни энергетикалул мюхчаншиврул масъалагу.
