Агьалинал мурадирттах вичIи дирхьунни

Лакрал райондалул администрациялий ДР-лул информатизациялул ва массовыйсса коммуникациярттал министр Сергей Снегиревлул кьамул бунни агьали.

Зулайхат Тахакьаева
Гъумучиял шяраваллил бакIчинал хъиривчу АхIмад Сулаймановлул бувсунни райцентрданий хIачIайсса щинал дузалшиндарал масъала щаллу бан къахъанай бушиву шиннардил дянив, му иширал ялув райондалул агьалинал цIания Аьрасатнал ПаччахIлугърал депутатътурайнгума цува увккун ивкIшиву.

— Щин гьарца шинах микIлачIлай дур. НигьачIаву ялагу дур — щин салкьи хъанай дур ризкьилулгу щин хIачIлачIисса неххава, ми марцI дуккан дансса цукунчIавсса шартIру дакъасса кIанттава, — увкунни АхIмад Сулаймановлул.
Министрнал махъ буллунни ва иширал ялув, за бувчIусса цала коллегахъащалгу ихтилат бувну, му масъала щаллу бансса чаран лякъин.
Гъумучиял детсадрал хъунмунил хъиривчу Ума Аьлишаевал тавакъю бия 1930-ку шиннардийра дурсса детсадрал къатри цIу дуккан дан кумаг бувара тIисса. Ванил бусаврийн бувну, детсадрайн занай усса ур 116 оьрчI ва, къумашиву душиврийн бувну, гьарца оьрчIащал зунсса шартIру ссуссукьусса дусса дур.

Министрнал цIувххунни му ишираву муниципалитетрал ци кумаг буллай буссарив. Мунихун райондалул бакIчинал цалчинма хъиривчу Абубакар Къюннуевлул бувсунни детсадрал къатри щаллуну цIу дуккан дансса каширду муниципалитетрал дакъашиву.
КIулушацIрал шяраваллил бакIчи Нураттин Юсуповлул гьаз бунни Бабаюртуллал кIанттайсса 130 гектар аьрщарал гьарца тIювардащал ва лухччащал, закондалуцIун къадаркьуну, дуллуну душиву «Теречный» МУП-рахьхьун . Министрнан ккаккан бунни личIи-личIисса кIанттурдайн гьан бувсса ходатайстварду.

Райондалул жагьилтурал цIания жагьилтурал иширттал, спортрал ва туризмалул отделданул каялувчи Малик ХIусмановлул тавакъю бунни райондалий спортзал баврицIун кабакьу бан.
«Райондалий спортрал секциярттайн заназисса оьрчIру хъинну чIявусса бур. Райцентрданий бувагу бусса ца спортзал биял хъанай бакъар. Жун багьлай бур, спортрал инвентарьгу тиннай-шиннай ххюрхху дуллай, кувннил хъирив кув личIи-личIисса секциярдай зун», — увкунни Малик ХIусмановлул. Министрнал махъ буллунни гьарца суалданул ялув хъирив увккун, жавабру дулун.