Язиминнал кьюкьлуву

Ахъушиял райондалул бакIчинал хъиривмур Эльвира ХIасанхIусайнова

Уттигъанну хьусса ДР-лул Культуралул министерствалул коллегиялул батIаврий республикалул культуралул зузалтран дуллунни личIи-личIисса наградартту.Ми дуллуминнавух бур къачансса лакгу, цалгу чIярусса шиннардий респуб­ликалул культура дуруччавриву хъунмасса захIмат бихьлахьисса. Кказитрал номердай жу минная, ца-ца, кIи-кIия тIий, бусанну, чичинну.

КIива миллатрал ххуй тIутIи

Ахъушиял райондалул бакIчинал хъиривчуну зузисса, Бархъаллал шярава­сса ХIасанхIусайнова Эльвира Кьурбанисмяиллул душнин дуллунни Аьрасатнал Культуралул зузалтрал профсоюзрал чулуха­сса ХIурматрал грамота.
Бувну бур Эльвира 1971-ку шинал Ахъушиял райондалий Бархъаллал шяравасса Кьурбанисмяиллул ва Бидаятлул кулпатраву. Вайннал кулпат ялапар хъанай бивкIун бур Аьш­ттарханнай (Эльвирагу, ванил ссугу бувну бур Бархъарав). Махъ бивзун бур Къизилюртуллал райондалийсса Бавтугъай поселокрайн, 1978-ку шинал тIурча – Ахъушиял райондалийн Ахъушиял шяравун.

Ахъушиял райондалий буклай буссар «Путь истины» тIисса кказит. Уставрайн бувну, му буклан аьркинну буссар 3 мазрай – оьрус, дарги ва лакку.

Эльвирал ппу Кьурбанисмяил Ахъушиял райондалул полик­линикалий ккарччал техникну зий ивкIун ур, нину Бидаятгу миккува – сестра-хозяйкану. Эльвирал къуртал бувну бур Ахъушиял шяраваллил 1-мур школа, бувххун бур ДГУ-лул романо-германский филологиялул факультетрайн, паланг мазрал ва оьрус литературалул отделениялийн. 1993-ку шинал ЯтIул дипломрайну му къуртал бувну бур.

2013-ку шиная шинмай Эльвира бур Ахъушиял райондалул бакIчинал хъиривчуну, ванийн багьлай бур социал масъалар­тту. Эльвирал каялувшиндарай райондалий дуллай бур чIярусса давуртту. КIицI лаганна анжагъ ца-кIира: «Чиндирчиро» базалий гъинттул буллай бур жагьилтурал республикалул, Аьрасатнал ва дунияллул лагрулийсса форумру, Ахъушав буллай бур лавайми классирттал дуклаки оьрчIансса форумру. Спортралми иширттая тIурчан, махъсса кIира шинал дянив буллай бур эндуро журалул (мотоспорт ва велоспорт хIаласса, дайшишрурду дусса, къарахIатсса ххуллурдайхсса) бяст-ччаллу яни мотокроссрал соревнованияртту. Ларгсса шинал вай бяст-ччаллавух гьуртту хьуну бур «Ночные волки» цIанилусса суккушиндаравасса Москавуллал байкерталгума, мукунма Аьрасатнал цайми регионнаясса спортсменталгу.

Эльвирал бувсунни ттунма ттинин къакIулну бивкIсса ца укунсса затгу: «Жул, Ахъушиял, райондалий буклай буссар «Путь истины» тIисса кказит. Уставрайн бувну, му буклан аьркинну буссар 3 мазрай – оьрус, дарги ва лакку. Амма, цуксса хIайпнугу, му кказит так оьрус ва дарги мазурдий буклай буссар. Райондалий ялапар хъанахъисса жулва лакрал щархъал жяматирттахь цимил учирчагу, микку хъанахъисса иширттая лакку мазрайсса информация дуллалияра куну, му даву щаллу дансса инсан уклай акъассар, зуруй цалларагу му кказитрай лакку мазрайсса хавардащалсса вкладыш дуккан дуваншиврул», – тIий бур Эльвира.

Эльвиран цинма кIулли ла­кку маз, дарги маз, паланг маз, ва цIанасса чIумал лахьлай бур ингилис маз.
Эльвирал дур ларайсса кIира кIулшиву, ванил бувккуну бур ДГИНХ-лул экономикалул факультетгу.
Эльвира бур Ахъушиял райондалул бакIчиначIасса Хъаннил советрал председательгу, му къуллугърайгу ва райондалул циняв шяраваллаву дуллай бур личIи-личIисса давуртту.
Эльвирал буттал ппу Бу­ттал КIанттул цIанийсса дяъвилий ятIа-тIар бакъа акъа хьуну ур, ниттилма ппу дяъвилул ва дяъвилия махъсса шиннардий Бархъаллал шяраваллил советрал ва колхозрал председательну зий ивкIун ур. Ппу Кьурбанисмяил аьпалул хьуну ур 2006-ку шинал, муния махъ Эльвирал, ванил ссил ва уссил цалла нину дурцуну дур шагьрулийн. Эльвира цуппа тIурча, зузи кьинирдай бур Ахъушав, бигьалагай кьинирдай – МахIачкъалалив.

Даргиял дянив хъунма хьусса лакку душ лавайсса хIурматрай бур райондалийгу, республикалийгу. Дагъусттаннал муниципалитетирттал каялувчитурал хъиривчутураву Эльвира ХIасанхIусайновал цIа дур хьхьичIунминнал сияхIрай. Ванил бюхъулуцIух райондалий дуллалисса давурттая бусланмур хъинну чIявур.
Щак бакъа, Эльвира Кьурбанисмяиловна кунмасса пишакартурахьри шяраваллал, аьмну республикалулмургума, гьунттийсса оьрмулул ххуй-хъинмур бусса.


ДР-лул культуралул министр Зарема Буттаева ва Каспийскаллал ЦБС-рал 2-мур филиалданул хъунмур Гулмира Ажуева

Луттирдал паччахI

Каспийскаллал ЦБС-рал 2-мур филиалданул хъунмурну зузи­сса, ДР-лул культуралул лайкь хьусса зузала Ажуева (Закаева) Гулмира ЯхIиянал душнин дуллунни Дагъусттан Республикалул Культуралул министерствалул чулухасса ХIурматрал грамота.

Бувну бур Гулмира Каспийскалий Ваччатусса ЯхIиянал ва Зубайдатлул кулпатраву. Шагьрулул 7-мур школа къуртал байхту, ва цила ниттилссил, Н. Юсуповлул цIанийсса Респуб­ликалул оьрчIал библиотекалул хъунмурну бивкIсса аьпа биву, Султанова Кубра Аьлиевнал маслихIатрайн бувну, Каспийс­каллал библиотекалий зун бивкIун бур. БакIрайва зий бивкIун бур комплектованиялул отделданий, махъ – 2-мур филиалданул хъунмурну. Даврия якъабувцун, бувккуну бур ДГУ-лул филологиялул факультетрал библиотекалул отделение. Ва филиалданул хъунмурну зий ванил 40 шин шавай дур.
Гулмирал нину ва ппу, аьпа бивухъул, бувну бур Ваччав, кулпатрал хьуну махъ бивзун бур Каспийскалийн. ЯхIия зий ивкIун ур «Дагдизель» заводрай, ванал сурат ХIурматрал улттуя лирккун дакъар. Зубайдатгу оьрмулухун зий бивкIун бур заводрай, махъ тIурча, «МахIачкъала-Москва» поездрай шеф-поварну.
Гулмирал лас ХIажи зий ур Таможнилул къуллугърай, вайннал ур ца арс, арснал оьрчIру. Арс Заур зий ур Каспийскаллал листовой пюрундалул заводрай.
Гулмирал каялувшиндарай ва библиотекалий дуллалисса давуртту чIярур: луттирдал выставкартту, обзорду, буттал улклул дарсру, экологиялул ссят­ру, литературалул дуссухалтту, чичултрал юбилейрду. Шагьрулул оьрмулуву ванил дуллалисса давурттал дазу дакъар.

Лажин хIадур дурссар
Бадрижамал Аьлиевал