ЦIанихсса театрал институт къуртал буллалиминнавух ур лакку оьрчIгу

Театрданул шинал лагрулий апрель зурул 15-нния 18-ннийн Къумукьнал театрдануву хъунмасса тIайлабацIулий хьунни Б. Щукиннул цIанийсса Театрал институтрал Дагъусттаннал студия къуртал буллалиминнал гастроллу.Миннал ватанлувтуран ккаккан бунни дипломрал давурттуну хьусса спектакллу – дунияллул классикалул машгьурсса произведенияртту: «Миллионерша» (Б. Шоу), «Скамейка» (А. Гельман), «В ожидании Годо» (С. Беккет), «Двое на качелях» (У. Гибсон) ва М. Горькийл пьесалиясса «Васса».


Зулайхат Тахакьаева
Билаятрал ца яла цIанихсса театрал институт хьхьичIунну къуртал буллалиминнавух ур жула лакку оьрчIгу, Уриннал шяраватусса КьурбанмахIаммад Шабанов. Усттарну ккаккан дурунни ванал «Васса» спектакльдануву Вассал арснал, чурххал аьйплувшиву сававну лявкIусса, ниттиясса ттюнгъашиврух мякьсса Павеллул сипат. Ххаллилну роль дургьунни «В ожидании Годо» спектакльданувугу.

КьурбанмахIаммадлул шанна шин дурссар Лакрал театрдануву зий. Зувира шин лях ларгун махъ, 2015 шинал Щукиннул институтраву цIунилгу дагъусттаннал студия тIивтIукун, театрданул хъуниминнал тIайла увккун, ва лавгун ивкIссар актернал ус­ттаршиву магьир дуллан. Мукьра шин нахIакь къаларгшиву жунма исват хьунни.
Барчаллагьрай ур Кьур­банмахIаммад театр­данул каялувчи Бадрижат МахIам­мадхIажиевайн, театрдал магьирлугърал кIулшиву ларай дансса ххуллийн тIайла ацIан аврихлу.

«Диплом ласун кIива барз ттигу ливчIун бур. КъакIулли кьадарданул чунай утанссарав», — тIий ур КьурбанмахIаммад. Жуварив умуд къакьукьинну гьунар бусса актер аьзизсса театрданувунай зана хьунтIишиврийнсса.