Ттул хъамалли Кибрикхъул

Андрей Бабаев ва Нина Кибрик

Сентябрь зуруй 2018 шинал «Дагъусттаннал правда» кказитрай дия Кибрикхъая бусласисса макьала. Цар Кибрикхъул?

1980-ку шиннардий Хъусращиял школалийн бувкIун бивкIссар МГУ-лул 7-8 студент. Вайннащал ия машгьурсса профессор Александр Евгеньевич Кибрик ва нара Вихьуллал школалий дарс дирхьусса Къяниятусса Жамалов Сулайман Къадал арс. Сулаймангу та ппур­ттуву, МГУ-лул химиялул факультетгу бувккуну, Дагъусттаннал медициналул институтраву дарс дихьлай уссия.

Вайннал экспедиция Хъусрахьхьун бувкIун бия, мюрщи миллатирттал мазру цукун лахьлай бурив ххал бан. Та ппурттуву миннал рирщуна суратру, цIухху-бусурду бувна ниттил мазрал дарсру дихьлай бивкIсса РахIимова Жамилатлухь. Цивппагу экспедициялул даву къуртал хьуннин яхъанай буссия школалий ца классраву. Миннащал бия кьай дирхьусса ца чIиви машинагу. Цалла даву къуртал дурну, ми яла лавгуна махъунмай.
2015 шинал Хъусращиял школалул учитель ХIусайнаев Садруттин увкIуна ттучIан, ца хъамитайпа ва адамина бувцуну, вай москвичтал бур тIий.

Ми бия та лингвист-профессор Киб­риклул душ Нина ва мунил лас Андрей Бабаев. Нина бур художник, Андрей ур режиссер. Бувсъссия на миннахь та экспедициялия ттунма кIулмур ва ккавкмур. На цахьва бувсмур миннал лавсуна видеолийн, рирщуна жущал суратругу. Пиш-каш бувссия на миннан нава ттула буттал шяраваллил тарихрая чивчусса лугу.

ЖучIа хъамалугу хьуну, чIун чIалсса дунугу, цан Агъуллал райондалийнгу биян аьркинссар тIий, лавгуна. Миннахьсса машиналийгу хъунисса хIарпирдай «Экспедиция» тIий чивчуну бия.
Муния махъ «Дагъусттаннал правда» кказитрай дурккунни, Дагъусттаннал мюрщи миллатирттал мазру лахьхьаврицIун бавхIуну, Кибриклул каялувшиндаралусса экспедициялул дурсса даврия бусласисса макьала.

Нина ва Андрей бувкIссия «Кунаки» тIисса фестивальданийн Дагъусттаннайн. Му фестивальданий Нинал бувсса ихтилат ляличIинува асар хьунсса бия. Мунил мукунма бувсуна, цила ппу экспедициялущал ив­сса кIанттурдайн лавгун, щалва мунал ахттаршиннардал тарих цачIун бувну, кино ларсун душиву, бувсуна му киноран «Киб­риклул Дагъусттан» тIисса цIа дирзшивугу.

ДакIния къабуккай фестивальданий Нинал лавхъсса махъгу: «Жул ппу – аьлимчу-лингвистнал, путешественникнал, элмурдал докторнал, МГУ-лул профессорнал, МГУ-лул теориялул ва прикладной лингвистикалул филфакрал кафедралул каялувчинал, РАН-далул член-корреспондентнал, Британнал академиялул членнал, Да­гъусттаннал элмулул лайкь хьусса ишккаккул, бивкIссар цалва Дагъусттан! 1967 шиная айивхьуну, цала экспедициялущал 30-ла увкIссар му Да­гъусттаннайн. ДакIнихтуну Дагъусттан ххира хьусса инсаннаща бакъа мукунсса захIмат бишин къашайссар. Хъинну ххирая мунан зунттал билаят ва зунттал агьали. Дагъусттаннайри мюрщи миллатирттал мазру лахьхьаврил даву ахттар дуллалисса экспедициялул гьанугу бивзсса», — куна Нинал.

Асадуллагь Аьллаев,
ш. Хъусращи