Ккуллал райондалиясса хаварду

Март зурул ахирданий Ккуллал райондалул бакIчи Шамил Рамазанов хьунаавкьунни Ккуллал шяраваллил жяматращал. Хьунабакьаврий гьуртту хъанай бия райондалул администрациялул отделлал каялувчиталгу.

Райондалул бакIчинал вичIи дирхьуна шяраваллил жяматрал гьаз буллалисса масъаларттах. Миннувух бия оьрчIан 14 шин хьуну махъ паспортру ласун багьлагьисса чIумал, 18 километралул манзилданий Гъумукун гьан багьлай бушиву, цал лавгун дузал къахъанай бикIайшиву. Гьаз буллай бия мукунма налогирттал идарарттал цачIанма буржру ккаккан буллалисса чагъарду гьан буллай бушиврул, ци буржру буссаривгу кIул буван къахъанахъишиврул ялувсса ихтилатру. Гьаз бувна жяматрал оьрму бигьа баврил ялув дуван аьркинсса давурттацIун бавхIусса масъаларттугу. Циняв­ппагу суаллахьхьун жавабру дуллуна райондалул бакIчинал.
Хьунабакьаврий ххал бивгьуна Дагъусттаннал БакIчинал рисалалуву кIицI бувсса агьамсса кIанттурдугу.


Март зурул 30-нний райондалул администрациялул къатраву жямат кьамул бувунни Дагъусттаннал Хъус ласай комитетрал председательнал буржру чIумуйну биттур буллалисса ХIажибеков Жяъпардул.

Ванащал хьунабакьин був­кIун бия: Ккуллал шяраваллил бакIчи Аьлиев Рамазан, ЦIущарниясса Маммаев Александр, Ваччатусса Сулайманов Рашид.
Аьлиев Рамазаннул кIицI бувна шяраваллил тиячулийсса пирмалийн нанисса ххуллийсса ламу нигьачIийну бушиву ва бакьин буван багьлай бушиву. Ванихава лавхьхьусса масъала гьаз бувуна Маммаев Александрдул. Хъурхъияту ЦIущуллал шяравун нанисса ххуллу ва ванийсса ламу мукунма авариялул тагьарданий бушиву. Гьаз бувна мукунма цаймигу жяматрал оьрму бигьа баврил чулинмайсса суаллу.
Ми цинявппагу республикалул министртурайн тапшур бантIишиву бувсуна ХIажибековлул.