Гьар кIанай тIалавну бур

Вай гьантрай жула ххаллилсса лакку душ, Аьрасатнал ФСИН-лул 5-мур Медсанчастьрал клинико-диагностический лабораториялул хъунмур,ХIажимахIаммадлул душ Бирлиянт Жабраиловал Медициналул аралуву зий хьуну дур 50-нния лирчусса шинну. Вай интнил гьантрай кIицI лаглай дур ва бувсса кьинигу. Республикалул ФСИН-лул управлениялул зузалтрал тавакъю бунни жухь, цала бусравсса зузала кказитрайхчIин барчагу бувну, вания ца-кIива махъ чивчуну ччива куну.

Андриана Аьбдуллаева
Бирлиянт бур ЧукIуннал шяравасса. Хъуними классирттаву Ккурккуллал школалий дуклай бивкIун бур. Школалий дуклакисса чIумалгу ванил сурат мудан ххуйну дуклакиминнал ул­ттуйн лархъун дикIайссия тIий, буслай бур ванищал архIал дуклай бивкIми. Мяйва класс був­ккуну махъ ва бувххун бур Буйнакскаллал медициналул училищалувун. Училище къуртал байхту, зун бивкIун бур оьтту бутIайсса станциялий операцион медсестрану.

Зий бунува, бувххун бур Дагъусттаннал университетрал биологиялул факультетрайн. Университет къуртал бувну махъ ва бувцуну бур республикалул Виваллил иширттал ва Юстициялул министерстварттал цачIусса медсанчастьравун врач-лаборантну зун. Ва даврил пишакаршиву лахьхьин 4-5 зуруйсса курсру буккин багьлай, Бирлиянт тIайла бувккун бур ми курсирдайн Ттуплислив.

Мунияр махъ хIакин-лаборантну ва зий бивкIун бур республикалул туберкулезрал диспансерданий, 4-мур колониялий (ЛИУ-4), 7-8 шинай туберкулезрал азарханалий. Ва азархана лакьлакьи­сса чIумал, даву канилух дурксса Бирлиянтлухь тавакъю бувну бур Тюбелий­сса 7-мур колониялий лаборатория тIитIа куну. Лабораториягу тIивтIуну зий цаппара шинну шайхту, цIунилгу бувцуну бур цуппа зий бивкIсса 4-мур колониялийн. Ххаллилсса пишакар хIисаврай, гьар кIанай тIалавну бивкIун бур.

2016 шинал, цIусса къатригу дурну, республикалул ФСИН-лул управлениялул МСЧ-5 (медико-санитарная часть) зузи дайхту, шикку лаборатория тIитIин бувцуну бур ва даврил опыт бусса Бирлиянт. ЦIанасса чIумалгу ва лабораториялул хъунмурну бур. Шикку анализру дулун букIлай бур цинявппа управлениялул зузалт ва миннал кулпатру.

— Навагу, кIива лаборантгу бакъа бакъашиврийн бувну, жуйн цахъи гуж багьлай бур. Цалчинмур кварталданий, масала, жу 1700-нния ливчу­сса инсантурал анализру дурну дур. Хъиннува хьхьавчусса иш бикIай зузалтрал профосмотр дуллалисса чIумал, — тIий бур Бирлиянт.
Каялувчитал ва управлениялул зузалт, ва даву, ванил кунна, цаманал къадувантIиссар тIий, вания мудангу рязину бур. Ванин аьркинмур щаллу дан, чIарав бацIан хIадурну бур.
Цила даврий бакъассагу, аьчух­сса, аьмал-хIал бавкьусса Бирлиянт бусравну бур чIахху-чIарахнангу.

Ванил бур ххуйсса тарбия ва ларайсса кIулшивуртту ларсъсса арсгу, душгу. Арснал къуртал бувну бур Москавуллал психологиялул университет ва Дагъус­ттаннал шяраваллил хозяйствалул институт. Душнил къуртал бувну бур Дагъусттаннал университетрал биологиялул факультет, дурурччуну дур биологиялул элмурдал кандидатнал диссертация.
Дустурал, даврил уртакьтурал цIания барча тIий буру Бирлиянтлухь бувсса кьини. ЦIуллушиву дулуннав, оьрчIал ва оьрчIал оьрчIал ххари буллай личIаннав ина!