Буттал миналуцIа хьун дурссар 24 шяравалу

Гьамиящиял ризкьи-кьинилул зузалт

Гьамиящи

КутIасса справка
Гьамиящиял шяравалу диркIссар Гъумучату кьиблалул ва баргъбуккавал чулийннай 15 км.манзилданий, чIаххуврайсса 2-мур ЦIувкIуллал, Ккацраннал ва ЦIущуллал шяраваллал дянив.


1944 шинал, зунттава арандалийн дизан дуллалисса чIумал, Гьамиящиял шяраву бивкIун бур 96 къатта, яхъанай ивкIун ур 382 инсан.
Байбихьулул школа Гьамияхь тIивтIуну бивкIун бур 1930-ку шинал, инсан заллусса къатраву. 1936-ку шинал бувну бур цIусса школа, арулва класс бусса. Миккун занай бивкIун бур чIаххуврайсса шяраваллал оьрчIругу. Директорну зий ивкIун ур ЧIятусса Макьсуд Кьурбанов. Дарсру дихьлай бивкIун бур МахIаммад Оьмаров, ­Оьмар Жамалуттинов, Муса ХIамзаев, Аьли Нугъаев.
Хъунмасса Буттал кIанттул цIанийсса дяъви байбивхьусса чIумал, Гьамиящату аьрайн лавгун ур 51 инсан, миннавату 38 зана къавхьуну ур махъунай.

Гьамиящиял школалул коллектив. 2007 ш.

Дуклаки оьрчIру тIутIи батIлай. 1988 ш.

Зунттаву бунива сакин дурсса Гьамиящиял колхозран цIа диркIун дур «Красный чабан» тIисса, цIусса кIанайн бивзун махъ тIурча, даххана дурну, хьуну дур Кировлул цIанийсса колхоз. Бизан буллалисса чIумалгу, бивзун махъгу колхозрал председательну зий ивкIун ур Аьли Оьмаров.
ЦIуссалакрал райондалий Гьамиящиял школалул цалчинсса выпуск хьуну дур 1946-ку шинал. Гьамиящиял школалий зий бивкIун бур оьрус учительницахъулгу: Прасковья Сергеевна, Анна Васильевна, Алла Андреевна ва Нина Павловна.
Гьамиящиял жямат­рал арс Аьвдулжалал ХIусманов зий ивкIссар ЦIуссалакрал ва Ккуллал районнал цалчинма секретарьну.
ХIакьину Гьамиящиял шяравалу салкьи хьуну дур Новостройрал миналий. Зий бур администрация, бур дянивсса даражалул школа.

Жяматрал аслийсса арсру