ХъункIултIутIив – зунни!

Лакрал райондалул Магьирлугърал къатлуву лайкьсса даражалий хьунни Хъаннил байрандалун хас дурсса шадлугъ.

Зулайхат Тахакьаева
Хъами барча буллай, район­далул бакIчи Юсуп МахIаммадовлул кIицI лавгунни лакрал хъами мудангу арантуращал хъар дургьуну бивкIшиву гьарца иширттаву – Лакку билаятрайн чапхунчитал ххявхнигу, Хъун дяъвилул шиннардий захIматрал фронтрайгу, дяъвилия махъ колхозру, совхозру ччаннай дацIан дайнигу, хIакьинусса кьинигу хъами хъуннасса гьурттушинна дуллай бушиву райондалул оьрмулул гьарцагу аралуву.

— Вана, ттигъанну, МахIач­къалалив Мариям Ибрагьимован 100 шин шаврил мажлисрайгу жула дуклаки душварал агьамсса гьурттушинна дурунни. Гъумучиял ОьрчIал магьирлугърал школалул «Гъази-Гъумучи» ансамбльданул душварал къавтIаврил тIурча, цинявппа хIайран бувунни,- увкунни Юсуп МахIаммадовлул. Миннан буллунни райондалул администрациялул чулухасса барчаллагьрал чагъарду ва тIутIив.
Райондалул магьирлугърал къатлул зузалтрал ва оьрчIал магьирлугърал школалий тарбия хъанахъиминнал ккаккан дурунни ххаллилсса концерт.

Муния махъ шадлугъ хьунни райондалул администрациялийгу. Администрациялий зузи­сса цинявппагу хъаннин Юсуп МахIаммадовлул дуллунни хъун­кIултIутIив.
Администрациялий зузисса хъами барча бан ххаллилсса тIутIал кацIурдищал бувкIун бия Мариян Илиясовал цIанийсса «Дара­ччи» фондрал хъунмур Гульшан Хасаева ва фондрал Гъумучиял филиалданул хъунмур ПатIимат МахIаммадова.