Жула арамтал тачIав Ватандалухлу жан дулун махъаллил къашайсса бивкIссар. Ватан дуруччаву му аьралий янналувусса инсаннал яла жаваблувмур буржну хъанахъиссар.
Арцу, хъус инсаннал ччиманан дулун бюхъайссар. Амма къатта-къуш, аьрщи-чару тачIавгу щихьхьунчIав къабулайссар. Ватан дуруччаврил чулинмайсса гьавас жула Дагъусттаннал инсантурал оьттувува, ттурчIавува бур.
***
[dropcap]Ф[/dropcap]евраль зурул 22-нний райондалул библиотекалуву хьунни Ватан Дуруччултрал кьини кIицI лаглагисса мажлис-байран. Байрандалий гьуртту хъанай бия Ваччиял школалул 4-мур классрал дуклаки оьрчIру. ОьрчIру байрандалийн хIадур бувну бия вайннал учительница ХIусайнова ХIуриял.
***
[dropcap]Ч[/dropcap]Iяйннал культуралул къатлуву хьунни вара кьинилун хас дурсса шадлугъ. Микку ихтилатру бувна культуралул къатлул хъунмур СалихIат Алхасовал, ЧIяйннал шяраваллил бакIчи Ися МахIаммадовлул, дяъвилул ветеран Басират Мамедовал, Дагъусттаннал лайкь хьусса учитель ПатIимат Рамазановал ва м.ц. Ккаккан дурна дакIний личIансса культуралул программагу.
Мура кьини ЧIяйннал школалул клубравугу хьунни хъинну ххаллилсса театрал зумунусса шадлугъ. ЧIяйннал школалул дукIу сентябрь зуруя шинмай директорну зузисса Альбина ХIаммакуевал му чIумул мутталий дурсса давуртту хъинну ккалли дансса хьунни.
[dropcap]Ш[/dropcap]колалул клуб бия щапI куну шяраваллил инсантурал, дуклаки оьрчIал бувцIуну. СахIнагу чIюлу бувну бия ххаллилсса даражалий.
Аьралий яннардаву дуклаки оьрчIру ва вайннал учительтал бувккуна сахIналийн. Яла ккаккан дуруна театрал зумунусса инсценировка. Душварал ва оьрчIал щаллу бувна дяъвилун, ватандалун хас бувсса балайрду, дурккуна дикломацияртту. Ккаккан дуруна дяъвилул чIумалсса чIярусса суратру. Дуруна оьрчIал ва душварал саллатIнал вальсругу.
Райондалул Культуралул къатравугу хьунни Ватан Дуруччултрал кьинилул шадлугъ. Микку махъ лавхъунни райондалул администрациялул отделданул каялувчи Шамххал Хизриевлул.
Ванал шадлугърайн бавтIми барча бувна райондалул бакIчинал, райондалул мажлисрал ва цала цIания. Райондалул культуралул зузалтрал ккаккан дурна хъуннасса ххуйсса концерт. Мунивух гьуртту хьуна ГьитIинова Зояханум, СалихIова Шавлухъ, Кьурбанов ХIабибуллагь, ЦIущарнил къавтIалт, Даллаева Зульфия, Ибрагьимов Сасзани, Хъюйннал коллектив, МахIаммадова Асият, АхIмадова Шамай, Даллаева Шахсалан, Ккуллал шяраваллил къавтIалт, Суллуев Муслим, Элдарова Шавлухъ, Вихьуллал къавтIалт, Аьлиева Саманият, Хъювхъиял балайчитал ва цаймигу.
Репортаж хIадур дурссар ХIажимурад ХIусайновлул
