«Аьрасат – ттул Ватан»

ПатIимат ХIасанова

Уттигъанну Каспийскалий Аьрасатнал Халкьуннал аслийсса культуралул центрданий хьунни «Аьрасат – ттул Ватан» тIисса цIанилусса фестиваль. Му сакин дурну дия ДР-лул Культуралул министерствалул, Республикалул Халкьуннал творчествалул къатлул.

Фестиваль тIитIлай, Аьрасатнал Халкьуннал аслийсса культуралул къатлул директор Башикар Гадаевал бувсунни чIяву миллатру бусса Дагъусттаннал халкьуннал аьдатирттая, багьу-бизулия.

Фестивальданул лагрулий­сса бяст-ччал хьунни шанна номинациялий: «Хореографиялул ансамбль – халкьуннал язисса къавтIаву», «Халкьуннал язисса балай», «Назму дуккаву».
Фестиваль дайдирхьуна ОьрчIал творчествалул къатлул тарбиячитурал – «Зун­ттал оьрчIру» ансамбльданул. Мукунма къавтIаврил гьунар ккаккан бувна «Каспийрал жагьилшиву» ва «Зунттал бусала» тIисса ансамбльлал.
Дагъусттаннал халкьуннал мазурдийсса балайрдайну, хъин-хъинсса чIурдайну бавтIми ххари бунни «Чирахъ» тIисса цIанилусса сакиншиндарал оьрчIал.

Миннавух лакку мазрайсса балайрду увкунни Къуруллал шяравасса ХIасанова ПатIиматлул ва ЧIяйннал шяравасса Чикалкина Аленал (ванил нину Шарипат бур ва шяравасса).
Назму дуккаврилмур номинациялий хьхьичIунсса гьурттушинна дунни Каспийскаллал шагьрулул школарттал дуклаки оьрчIал.
ОьрчIал гьунардан кьимат бишлай бия цалла даву ххуйну кIулсса жюри.
ЛичIи-личIисса номинациярттай хьхьичIун ливчусса оьрчIан буллунни дипломру.